Aravot.am-ի հարցին, թե արդյոք այդքան մեծ ներկայացվածություն ունենալով ավագանիում, հնարավո՞ր են այս կամ այն որոշման շուրջ բանավեճեր, կարծիքների բախում եւ երեւանցու համար օպտիմալ լուծումներ, Երեւանի քաղաքապետ Հայկ Մարությանը պատասխանեց. «Եթե ուշադրություն դարձնեք, հանձնաժողովների 4 նախագահներից 3-ն անկուսակցական են եւ սա հենց այն պատասխանն է, որը մենք տալիս ենք հանրությանը: Եվ այն ընդդիմությունը, որը պետք է լիներ խմբակցությունից դուրս, մեզ մոտ այդ ընդդիմությունը խմբակցության ներսում է: Եվ յուրաքանչյուր հարց շատ երկար քննարկվում է եւ տարբեր տեսակետներ ունի հենց խմբակցության ներսում:
Հարցին, թե հանրապետական թաղապետերը ազատվելո՞ւ են աշխատանքից, Հայկ Մարությանն ասաց. «Մենք չենք դիտարկում թաղապետերին եւ մյուսներին ըստ կուսակցությունների»:
Ըստ քաղաքապետի, եթե քաղաքապետարանի, վարչական շրջանների աշխատակիցները պրոֆեսիոնալ են, բարձր մակարդակով գիտեն իրենց աշխատանքը եւ պատրաստ են ծառայելու, ապա իրենք չպետք է մերժեն այդ մարդկանց:
Հարցին, թե չի՞ տեսնում նրանց մեջ սեւ ուժեր, Հայկ Մարությանն ասաց, որ հարցն անհասկանալի է. «Ինչ է նշանակում սեւ կամ սպիտակ ուժեր»: Այն դիտարկմանը, թե՝ կուսակցական պատկանելությունը, պարոն Մարությանն արձագանքեց. «Էդ չի նշանակում սեւ կամ սպիտակ ուժեր: Ես արդեն ասացի, որ կուսակցական պատկանելությունն այս պահին մեզ համար կարեւոր չէ, մեզ համար կարեւորը մարդու պրոֆեսիոնալ կամ ոչ պրոֆեսիոնալ լինելն է»:
Լուսինե ԲՈՒԴԱՂՅԱՆ
