Լրահոս
Օրվա լրահոսը

Խառնաշփոթ ՀՔԺԿ-ի  վարկանիշային ցուցակներում

Դեկտեմբեր 09,2018 18:17

Հայաստանի քրիստոնեաժողովրդավարական  կուսակցության նախընտրական շտաբը բազմաթիվ խախտումներ է արձանագրել: Հիմնական խնդիրը վերաբերվում է կուսակցության վարկանիշային թեկնածուներին. ԿԸՀ կայքում հրապարակված նրանց համարները չեն համընկել ընտրաթերթիկի վրա հրապարակված համարների հետ: Մասնավորաբար, նման խնդիր է առաջացել Ավան համայնքում վարկանիշային ընտրակարգով առաջադրված Հայկ Սանոսյանի, Լոռիում՝ Գեւորգ Սուքիասյանի եւ Արաբկիր համայնքում առաջադրված Արա Մարկոսյանի  հետ:  Նրանք համապատասխանաբար 2-րդ, 6-րդ եւ 6/6 համարներից տեղափոխվել են 6/7, 7 եւ 5-րդ հորիզոնականներ: Aravot.am-ի հետ զրույցում Հայկ Սանոսյանն իր վրդովմունքն արտահայտեց, քանի որ ողջ քարոզարշավն իրականացրել է 2-րդ համարի տակ, նաեւ ոչ քիչ գումար է ծախսել քարոզարշավի համար: Հիմա պարզվում է՝ իր ընտրողները թյուրիմացության մեջ են ընկնում եւ չեն կարողանում կողմնորոշվել:

Կուսակցությունում այժմ արձանագրություններ են կազմվում, որոնք կուղարկվեն Կենտրոնական ընտրական հանձնաժողով:

Կուսակցության Շիրակի մարզի վարկանիշային թեկնածուներից Վարդան Սրտաշյանն էլ ահազանգում է, որ դրոշմապիտակը փակցվում է ոչ թե ընտրաթերթիկի, այլ ծրարի վրա: Իրենք բազմաթիվ նման դեպքեր են արձանագրել: Ասում է նաեւ, որ ծրարը հանձնաժողովի աշխատակիցը չի տալիս ընտրողին, այլ ինքն է քվեատուփի մեջ գցում: Երբ իր վստահված անձինք փորձել են հասկանալ՝ ինչու հանձնաժողովի անդամը ծրարը չի տալիս ընտրողին, վերջիններս պարզաբանել են իբր միամտաբար են այդպես վարվել:

Կուսակցության նախընտրական ցուցակի 2-րդ հորիզոնականը զբաղեցնող Մարիամ Մանուկյանն էլ Aravot.am-ի հետ զրույցում ասաց, որ իրենց վստահված անձինք մի շարք տեղամասերում արձանագրել են, որ կուսակցության N6 քվեաթերթիկը ընտրողներին չի տրվում: Նման դեպքեր են արձանագրվել  9/6 տեղամասում, 26/16-ում, Էրեբունիում գտնվող 11/5-ում, Աբովյանի Գեղաշեն համայնքի 28/1-ում եւ Չարենցավանի 27/36-ում:  Մարիամ Մանուկյանն ասաց, որ այս տեղամասերից շատերում իրենց վստահված անձինք նաեւ արձանագրել են, որ երբ նոր ընտրող է մտնում տեղամաս, տեղամասում գտնվող անծանոթ մարդիկ կուտակվում են քվեատուփի մոտ եւ անհնար է լինում հասկանալ, թե ինչ է կատարվում այդ պահին այդտեղ: Այս ամենի վերաբերյալ, ըստ Մարիամ Մանուկյանի, արձանագրություններ են կազմվել եւ ուղարկվել ԿԸՀ:

Նելլի ԳՐԻԳՈՐՅԱՆ

Համաձայն «Հեղինակային իրավունքի եւ հարակից իրավունքների մասին» օրենքի՝ լրատվական նյութերից քաղվածքների վերարտադրումը չպետք է բացահայտի լրատվական նյութի էական մասը: Կայքում լրատվական նյութերից քաղվածքներ վերարտադրելիս քաղվածքի վերնագրում լրատվական միջոցի անվանման նշումը պարտադիր է, նաեւ պարտադիր է կայքի ակտիվ հղումի տեղադրումը:

Մեկնաբանություններ (0)

Պատասխանել

Օրացույց
Դեկտեմբեր 2018
Երկ Երե Չոր Հնգ Ուրբ Շաբ Կիր
« Նոյ   Հուն »
 12
3456789
10111213141516
17181920212223
24252627282930
31