Անվտանգ, կանոնավոր և ապահով միգրացիայի գլոբալ հռչակագիրն ընդունվեց Մարոկկոյի թագավորության Մարաքեշ քաղաքում հրավիրված «Անվտանգ, կանոնավոր և ապահով միգրացիայի գլոբալ հռչակագրի բարձր մակարդակի միջկառավարական» համաժողովի ընթացքում:
Փաստաթուղթը հաստատեց Մարոկկոյի արտաքին գործերի նախարար Նասեր Բուրիտան, որը նախագահեց համաժողովը:
Համաժողովի մասին պայմանավորվածությունը ձեռք էր բերվել ընթացիկ տարվա հուլիսի 13-ին ՄԱԿ անդամ-պետությունների կողմից:
150 երկրների պատվիրակությունների թվում է նաև Հայաստանը՝ ի դեմս Միգրացիոն ծառայության պետ Արմեն Ղազարյանի:
Փաստաթուղթը իրավաբանորեն պարտադիր ուժ չունի, այն միայն գլոբալ համագործակցության ճանապարհ է բացում այդ ոլորտում՝ենթադրելով միգրանտների վերաբերյալ տեղեկությունների հավաքագրում և ընդհանրացում, նրանց տարրական իրավունքների իրականացում, աջակցություն արժանապատիվ աշխատանք գտնելու հարցում, ուղեկցում միգրացիայի բոլոր փուլերում, անհրաժեշտ փաստաթղթերով, հյուպատոսական ծառայություններով ապահովում, ինչպես նաև հավաքական պայքար անօրինական միգրացիայի դեմ, անօրինական միգրանտների ապահով և արժանապատվի վերադարձը հայրենիք ապահովելու, նրանց ռեադմիսիայի և լիարժեք վերաինտեգրման ուղղությամբ համագործակցություն:
«Միգրացիան միշտ մեզ հետ է, բայց այս աշխարհում, որտեղ այն անխուսափելի է և անհրաժեշտ, այն պետք է լավ կազմակերպված և ապահով լինի, ոչ թե վտանգավոր և անկանոն»,-ասաց ՄԱԿ գլխավոր քարտուղար Անտոնիո Գուտերեշը:
Ողջունելով մասնակիցներին ու երախտագիտություն հայտնելով ընդունող երկրին՝ Մարոկկոյի Թագավորությանը, ՄԾ պետ Արմեն Ղազարյանն անդրադարձավ 2016 թ-ին Նյու Յորքում ՄԱԿ գլխավոր ասամբլեայի նախաձեռնությամբ հրավիրված բարձրաստիճան պաշտոնյաների հանդիպմանը՝ նվիրված փախստականների ու միգրանտների մեծածավալ տեղաշարժերին, ինչն էլ միջազգային օրակարգում ծառացող խնդրի մասին էր վկայում:
«Հայաստանը վճռականորեն աջակցում է գլոբալ միգրացիոն հռչակագրին և հավատում, որ այն Փախստականների արձագանքման համապարփակ շրջանակի հետ միասին կարող է փախստականների հանդեպ պարտավորությունների իրականացման կարևորագույն ուղեցույց դառնալ:
Ուրախ ենք՝ արձանագրելու, որ գլոբալ հռչակագիրը իրապես արտացոլում է համալիր առաջընթաց և գործառնական պարտավորություններ, որոնք հնարավորություն կընձեռեն ամրապնդելու միջազգային համագործակցությունը մարդու իրավունքների պաշտպանության, մարդկանց թրաֆիկինգի ոլորտներում, ինչպես նաև կիսելու պատասխանատվությունը երեխաների իրավունքների պաշտպանության ու մնացած շատ ոլորտներում:
Մենք հավատում ենք, որ մարդու իրավունքների համընդհանուր կիրառումը պետք է հավասարապես եւ առանց խտրականության ներառի բոլոր կարիքավոր մարդկանց՝ անկախ նրանց գտնվելու վայրից եւ անկախ տարածքների քաղաքական կարգավիճակից, որոնցում ապրում են: Չպետք է մնան «մոխրագույն» տարածքներ»:
Հետագա խոսքում Ա. Ղազարյանն անդրադարձավ սիրիահայերին՝ ներկայացնելով նրանց տեղահանման պատմությունն ու Հայաստանի կառավարության պատրաստակամությունը, շարունակական մարդասիրությունը նրանց ընդունելու հարցում, ինչպես նաև հատուկ հեշտացված ընթացակարգերն ու փաստաթղթավորման գործընթացը:
Բացի Սիրիայի փախստականներից, ՄԾ պետը նշեց նաև Իրաքից, Ուկրաինայից, փոքր թվով նաև Աֆրիկայից ու Ասիայից Հայաստան հասնող և ապաստան հայցող անձանց մասին:
Վերջում ՄԾ պետը նշեց, որ Հայաստանը հավատում է, որ միջազգային հանրությունը պետք է վաղ ահազանգման վճռական քայլեր ձեռնարկի եւ, որ ավելի կարեւոր է, վաղ գործողության մեխանիզմների մշակի, անպատժելիության դեմ պայքարի, զանգվածային արտաքսումների և տեղահանումների կանխարգելման ուղղությամբ: «Մենք հավատում ենք ոչ միայն վաղ ահազանգման առաջնային կարևորությանը, այլև տեղահանման արմատական պատճառները վերացնելու անհրաժեշտությանը»,-ասաց նա:
Միգրացիոն ծառայություն
