ԱՄՆ ներկայացուցիչների պալատը 1932-1933թթ. Ուկրաինայում տարածված սովը ճանաչել է ցեղասպանություն: Այս մասին հայտարարել է Ուկրաինայի նախագահ Պյոտր Պորոշենկոն:
Նա, մասնավորապես նշել է, որ այդ որոշման վրա աշխատել են ուկրաինացի դիվանագետներն ու ուկրաինական համայնքը: Նա նաև նկատել է, որ գոլոդոմորը ցեղասպանություն ճանաչելը «պատմական որոշում» է:
Կոնգրեսի կայքում հրապարակված 931 բանաձևի տեքստում նշվում է, որ Ներկայացուցիչների պալատը «ճանաչում է ԱՄՆ՝ Ուկրաինայում սովի հարցով հանձնաժողովի եզրակացությունները, որոնք Կոնգրես էին ներկայացվել 1988թ. ապրիլի 22-ին, այդ թվում այն, որ 1932–1933թթ. «Իոսիֆ Ստալինը և նրա շրջապատը ցեղասպանություն են իրականացրել ուկրաինացիների նկատմամբ»»:
Ներկայացուցիչների պալատի Twitter-ի էջում նշվում է, որ այդ համարով բանաձևն ընդունվել է: Հոկտեմբերի 4-ին նմանատիպ բանաձև էր ընդունել ԱՄՆ սենատը:
Պորոշենկոն դա անվանել է երկու երկրների ռազմավարական համագործակցության ապացույց:
Ռուսաստանի ԱԳՆ-ից հայտարարել են, որ ուկրաինացիների սովը ցեղասպանություն ներկայացնելու փորձը «ոչ մի ընդհանուր բան չունի պատմական փաստերի հետ: Սովը դիպչել է ԽՍՀՄ տարածքում ապրող բազմաթիվ ժողովուրդների», ասել են գերատեսչությունից:
Պատրաստեց՝ Վիկտորյա ԱՆԴՐԵԱՍՅԱՆԸ
