«Ամերիկայի ձայն». ԱՄՆ-ի պետական հաստատությունները շարունակում են մնալ փակված և առանց ֆինանսավորման: Դեռևս չկա համաձայնություն բյուջեի ֆինանսավորման հարցի շուրջ, որը կապված է սահմանային պատի հիմնախնդրի հետ:
ԱՄՆ-ի նախագահը հրավիրում է Կոնգրեսի դեմոկրատ և հանրապետական առաջնորդներին մասնակցել, Սպիտակ տան ձևակերպմամբ, «սահմանային անվտանգության բրիֆինգին»: Այս պահին ԱՄՆ –ի դաշնային կառավարությունը ավելի քան 10 օր շարունակում է մնալ փակված:
Սենատում հանրապետականների առաջնորդ Միչ Մաքքոնելը պատրաստվում է մասնակցել բրիֆինգին: Դեռևս պարզ չէ, թե արդյոք քննարկմանը ներկա կլինեն դեմոկրատները:
Դեմոկրատներն ունեն մեծամասնություն Ներկայացուցիչների պալատում: Սպասվում է, որ դեմոկրատ առաջնորդ և պալատի խոսնակի թեկնածու Նենսի Փելոսին հանդես կգա մի շարք օրինագծերով, որոնք ֆինանսավորում կտրամադրեն մի շարք պետական հաստատությունների:
Առաջարկվող նախագծերը չեն ընդգրկում ԱՄՆ-ի ու Մեքսիկայի սահմանային պատի համար նախագահի կողմից առաջարկվող 5 մլրդ դոլար հատկացումը: Դեմոկրատներն առաջարկել են 1,3 միլիարդ դոլարի հատկացում ընդհանուր սահմանային պաշտպանության համար:
Սպիտակ տունը քննադատել է դեմոկրատներին՝ ընդգծելով, որ վերջիններս չեն նպաստում սահմանային անվտանգության ապահովմանն ու այլ երկրների կարիքներն ավելի բարձր են դասում սեփական պետության կարիքներից:
Հիշեցնենք, որ կառավարության ֆինանսավորման դադարեցման արդյունքում շուրջ 800 հազար պետծառայողներ դադարեցվել են վճարվելուց կամ պարտադրված են եղել չաշխատել:
Մայրաքաղաքի զբոսաշրջիկների համար մի շարք հիշարժան վայրեր ևս փակված են ներառյալ Սմիթսոնյան թանգարաններն ու կենդանաբանական այգին: Դրանք կվերաբացվեն միայն կողմերի միջև համաձայնության հաստատումից հետո:
