Հայաստանի կինեմատոգրաֆիստների միության նախագահ, ռեժիսոր Հարություն Խաչատրյանը Կինոյի տանը կայացած ասուլիսում հայտարարեց, որ քանի որ իրենց միությունը զբաղվում է նաեւ կինեմատոգրաֆիստների իրավունքների պաշտպանությամբ, իրենք պատրաստ են իրավական աջակցություն ցուցաբերել հացադուլի դիմած ռեժիսոր Հովհաննես Գալստյանին:
Նրա ձեւակերպմամբ, երկկողմանի մեղադրանքներ են հնչում, սակայն փաստն այն է, որ մարդը 2 շաբաթից ավելի հացադուլի մեջ է եւ վտանգում է առողջությունը:
«Ես կոչ եմ անում բոլոր կողմերին մտնել երկխոսության մեջ, որպեսզի խնդիրը լուծվի, քանի որ կյանքից ավելի կարեւոր բան չկա: Պատրաստ ենք իրավաբանական ծառայություն տրամադրելու Հովհաննես Գալստյանին, որպեսզի դատական պրոցեսներն արագացվեն»,-ասաց Հայաստանի կինեմատոգրաֆիստների միության նախագահը:
Մանրամասները` տեսանյութում:
«Երբ փոխվեց դարաշրջանը, կոլեկտիվ որոշումներին եւ կոլեկտիվ վայնասուններին վերջ դրվեց: Այժմ ամեն մի արվեստագետ իրավունք ունի իր կարծիքը հայտնելու, բայց այս հարցում միությունը միակարծիք է, եւ կոչ է անում Հովհաննես Գալստյանին դադարեցնել իր առողջության համար վնասակար այդ գործընթացը եւ գնալ իրավական ճանապարհով…Մենք պատրաստ ենք իրավաբաններով մտնել գործի մեջ եւ արագացնել գործընթացը, որպեսզի իրավական ճանապարհով խնդիրը հանգուցալուծվի»,-հավելեց նա:
Գոհար ՀԱԿՈԲՅԱՆ
