Կիրակի օրը` մայիսի 26-ին Լեհաստանում կայացած ԵԽ ընտրությունները, ՀՀ-ում Լեհաստանի նախկին դեսպան Եժի Մարեկ Նովակովսկին չի համարում եվրոընտրություններ: Դեսպանի համոզմամբ, դրանք աշնանը Լեհաստանում կայանալիք խորհրդարանական ընտրությունների առաջին փուլն էին:
ԵԽ-ը ընտրությունները դեսպանը մեկնաբանեց հայաստանցի լրագրողների հետ Լեհաստանի Արևելյան Եվրոպայի ուսումնասիրությունների կենտրոնում կայացած հանդիպման ժամանակ: Հայաստանցի լրագրողները Վարշավայում են Լեհաստանի արտաքին գործերի նախարարության եւ ՀՀ-ում Լեհաստանի դեսպանատան հրավերով:
Հիշեցնենք, այդ ընտրություններում մասնակցության անսպասելի ցուցանիշ գրանցվեց`43 տոկոս: Պարոն Նովակովսկին կարծում է, որ դա բավական ուշագրավ ցուցանիշ է, քանի որ աջ ուժերին թվում էր, թե իրենք հաղթել են կաթոլիկ եկեղեցուն, մինչդեռ հանրության նման մասնակցությունը եւ քվեարկության արդյունքը` 42, 4 տոկոս ձայն Լեհաստանում իշխող «Իրավունք եւ արդարություն» կուսակցությանը, արտահայտում են հանրային տրամադրությունները: Իսկ հանրային տրամադրությունները հօգուտ ազգային արժեքների են: Դեսպանն ուշադրություն է հրավիրում այն իրողության վրա, որ այս ընտրություններում հատկապես ակտիվ են եղել փոքրիկ քաղաքների եւ գյուղաբնակ հասարակությունը, մինչդեռ ավանդաբար, եվրոընտրություններին մասնակցում էին մեծ քաղաքների բնակիչները: Դեսպանի կարծիքով, հանրությունը միավորվեց նաեւ ընդդեմ նորաստեղծ «Վեսնա» կուսակցության, որը հանդես է գալիս հանրային կյանքից եկեղեցուն հեռացնելու, նույնասեռականների իրավունքների առաջ մղման թեզերով: Այս կուսակցության առաջնորդ Ռոբերտ Բեդրոն հայտարարել է, որ ինքը միասեռական է:
Այլ մեկնաբանությունները`տեսանյութում
Կարդացեք նաև
Հայաստանում Լեհաստանի առաջին դեսպան Տոմաշ Կնոտեի կարծիքով էլ, այս ընտրություններում մեծ դեր խաղաց նաեւ Լեհաստանում իշխող «Իրավունք եւ արդարություն» կուսակցության տնտեսական ծրագիրը, որը, դեսպանի գնահատմամբ, բավական ուժեղ էր: Նկատի ունենալով այս ընտրություններում մասնակիցների սոցիալական շերտերը, դեսպանը կարծում է, որ մարդիկ նաեւ այդ պատճառով ընտրեցին իշխող ուժին, որից ակնկալում են իրենց սոցիալական խնդիրների լուծում:
Մանրամասները` տեսանյութում
Ընդհանուր առմամբ, դեսպանների կարծիքով, այս ընտրությունները ցույց տվեցին, որ Եվրոպան առայժմ իր խնդիրներով է զբաղված եւ հասարակությունները այս ընտրություններով ցույց տվեցին իրենց վերաբերմունքը կառավարություններին`նրանց մղելով առավել ներքին գործերով զբաղվելուն:
Նելլի ԳՐԻԳՈՐՅԱՆ
