Քիչ առաջ պարզ դարձան ԵՊՀ ուսանողների հետ տարվող աշխատանքների կենտրոնի փակման հարցով կատարված՝ ԵՊՀ հոգաբարձուների խորհրդի անդամների փակ, էլեկտրոնային եղանակով հարցման արդյունքները:
ԵՊՀ ուսանողական խորհրդի նախագահ Դավիթ Ափոյանը Aravot.am-ի հետ զրույցում տեղեկացրեց հարցման արդյունքների մասին. «Էլեկտրոնային մեյլով հարցմանը մասնակցելու վերջնաժամկետը լրանում էր այսօր՝ ժամը 18.00-ին: Քիչ առաջ մեզ մեյլով տեղեկացրին, որ կենտրոնի հարցով հարցմանը մասնակցել է հոգաբարձուների խորհրդի անդամներից 20 հոգի և կենտրոնի փակմանը «կողմ» է քվեարկել 19 հոգի, մեկ հոգի՝ ձեռնպահ»:
Հետաքրքրվեցինք՝ իսկ ինքը մասնակցե՞լ է քվեարկությանը, Դավիթ Ափոյանը պատասխանեց. «Ես և հոգաբարձուների խորհրդի այլ անդամներ, ենթադրում եմ նաև ուսանողներից մի քանիսը, չենք մասնակցել քվեարկությանը, քանի որ նիստի օրակարգը հաստատված չէր և օրակարգում ընդգրկված հարցերն անհրաժեշտություն ունեին քննարկման: Մենք առաջարկել էինք, որ նիստը չեղյալ համարվի, հարցը դրվի ոչ թե հարցման կարգով, այլ մարդիկ գնան, նստեն, քննարկում լինի: Բացի դրանից պարոն Վաղարշյանը հրապարակել է մի փաստ, որի հիման վրա իրավական օրինականության կասկածներ էր տալիս այս օրակարգով նիստի անցկացման վերաբերյալ: Այդ ամենը հաշվի առնելով՝ մենք տեսնում ենք այս արդյունքները»:
Դավիթ Ափոյանն ասաց, որ մինչ այս հարցումը հոգաբարձուների խորհրդի անդամներն անձամբ գնացել ստորագրել են, բայց այս անգամ տեղեկացրել են, որ կարող են նաև էլեկտրոնային նամակների միջոցով անդամներն իրենց դիրքորոշումը հայտնել: Ուստի նրանք իրենց դիրքորոշումը հայտնել են էլեկտրոնային փոստով՝ ԵՊՀ հոգաբարձուների խորհրդի պաշտոնական էլեկտրոնային հասցեին, որը տնօրինում են հոգաբարձուների խորհրդի նախագահն ու քարտուղարը:
Կարդացեք նաև
Aravot.am-ը կապ հաստատեց նաև ԵՊՀ ուսանողների հետ տարվող աշխատանքների կենտրոնի տնօրեն Վահագն Վարագյանի հետ: Հետաքրքրվեցինք՝ որո՞նք են լինելու իր հետագա գործողությունները, նա պատասխանեց. «Սա ապօրինի նիստ է՝ չհաստատված օրակարգով հրավիրված, որ հարցի քննարկում տեղի չունենա: Կարող եմ ֆիքսել, որ իշխանությունները գնացին ապօրինությունների, որ կարողանան կենտրոնը լուծարել: Սա միանշանակ անհետևանք չի մնալու: Ես երկուշաբթի օրվանից արձակուրդի մեջ եմ, երբ սեպտեմբերին արձակուրդից կվերադառնամ, իմ գործունեության մասին հրապարակային կասեմ: Քննարկում եմ փաստաբանիս հետ այս իշխանությունների գործած ապօրինությունները դատական կարգով վիճարկելու հարցը: Իրենք արդեն ապօրինի որոշում են կայացրել, որ կենտրոնը փակվի: Ունեմ վիճարկելու մի քանի ճանապարհներ. իրավական, մյուսների մասին սեպտեմբերին կասեմ»:
Տաթև ՀԱՐՈՒԹՅՈՒՆՅԱՆ
