«Մի դեպքում ճանաչում ենք Սահմանադրական դատարանի կայացրած մի որոշումը, մյուս դեպքում՝ ոչ․ ե՞րբ ենք այս տարերայնությանը, այս շիլաշփոթին վերջ տալու»,- ՀՀ ԱԺ լիագումար նիստին հարցրեց ՀՀ ԱԺ պատգամավոր Արման Բաբաջանյանը:
ՀՀ ԱԺ-ն սեպտեմբերի 9-ին քննարկեց «Հայաստանի և Դանիայի թագավորության միջև եկամուտների և գույքի կրկնակի հարկումը բացառելու և հարկումից խուսափելու մասին» կոնվենցիան վավերացնելու մասին նախագիծը։ ԱԺ տնտեսական հարցերի մշտական հանձնաժողովի անդամ Հովիկ Աղազարյանը տեղեկացրեց՝ հարցն անցել է պետական բոլոր ատյաններով, որևէ խնդիր չի առաջացել: Այնուհետև կոչ արեց կողմ քվեարկել նախագծին:
Այս առիթով Արման Բաբաջանյանը, հիշեցնելով վերջին օրերին ՍԴ-ի շուրջ ստեղծված իրավիճակն, ասաց. «Վերջին օրերին ՍԴ-ի շուրջ բավականին լարված շրջան ենք անցնում: Հայտնի քրեական գործի վերաբերյալ ՍԴ հայտնի որոշումը ճանաչվել է սահմանադրական այդ նույն ՍԴ անդամների կողմից, որոնք որոշում են կայացրել հայտնի քրեական գործի շրջանակում: Ես էլ միացել եմ նրանց, որոնք որոշել են չճանաչել ՍԴ որոշումը: Մի դեպքում ճանաչում ենք Սահմանադրական դատարանի կայացրած որոշումն այս համաձայնագրի հետ կապված, մյուս դեպքում չենք ճանաչում: Ե՞րբ ենք այս տարերայնությանը, շիլաշփոթին վերջ տալու»:
Հովիկ Աղազարյանը հիշեց՝ երբ իրեն երեք տարի առաջ հարցնում էին, թե Սերժ Սարգսյանին համարո՞ւմ եք ՀՀ նախագահ, ասում էր՝ ոչ, ես իրեն համարում եմ ՀՀ ղեկավար: Այնուհետև հավելեց. «Հետևաբար ինքս ինձ իրավունք եմ վերապահում այն դրույթներն ու մոտեցումները, որ տվյալ պահին ցուցաբերում է ՀՀ ղեկավարը, մասնավորապես Արցախի պաշտպանության հետ կապված, իմ կոչումով թե էությամբ լծվում եմ այդ գործին օգտակար լինելու հանգամանքով: Մեկ այլ դեպքում ես չէի ճանաչում իր այդ քայլի լեգիտիմությունը: Այստեղ պետք է մտածենք պետականության իմաստով պարտականություն կատարելու մասին: Միանշանակ չէ հարցը, որ հեշտ լինի պատասխանել: Պետք է հաշվի առնենք, որ այդ ինստիտուտը կա ու գործում է»:
Կարդացեք նաև
Տաթև ՀԱՐՈՒԹՅՈՒՆՅԱՆ
