«Այն երկրներում, որտեղ գյուղատնտեսության նկատմամբ մեղմել են հարկման քաղաքականությունը, այդ երկրներում գյուղատնտեսության սրընթաց աճ է արձանագրվել»,- ՀՀ ԱԺ լիագումար նիստին վստահեցրեց ՀՀ ԱԺ փոխնախագահ Վահե Էնֆիաջյանը: ՀՀ ԱԺ-ն քննարկեց հարկային օրենսգրքում փոփոխություն կատարելու մասին օրենքի նախագիծը:
Վահե Էնֆիաջյանը փաստեց՝ ՀՀ-ն սոցիալական պետություն է և հավելեց. «Սա քաղաքական մոտեցման հարց է: Այս օրենսդրական նախաձեռնությունը գյուղատնտեսության մեջ հեղափոխական, իրական փոփոխություններ արձանագրելու մասին է: Եթե ուզում ենք գյուղատնտեսության մեջ էական փոփոխություններ մտցնենք, այս օրենսդրական նախաձեռնությանը պետք է հավանություն տանք»:
Վահե Էնֆիաջյանը հիշեցրեց՝ օրինագիծը գլխադասային հանձնաժողովում քննարկվել է, որևէ հարց չի տրվել. խորհրդարանի կողմից հնարավորություն է տրվում առաջին ընթերցում կողմ քվեարկել, երկրորդ ընթերցմամբ էլ դեռ պարզ չէ, թե ինչպես կքվեարկի խորհրդարանը:
Կարդացեք նաև
Այս առիթով ՀՀ ԱԺ տնտեսական հարցերով մշտական հանձնաժողովի նախագահ Բաբկեն Թունյանն արձագանքեց՝ պարո՛ն Էնֆիաջյան ջան, մենք մեր սխալը հիմա շատ արագ կուղղենք ու պարզաբանեց, թե ինչու են դեմ այս օրինագծին. «Այս նախագիծն էլ, ինչպես Լուսավոր Հայաստանի բերած նախագիծը, նպատակը բարի է, բայց իրականացման ձևը այդքան էլ բարի չէ, չար է: Բյուջեի միջոցների անհարկի վատնում է: Մի պարզ օրինակ բերեմ, եթե, օրինակ, մեկը հարյուր դրամի կարիք ունի, 1000 դրամ տալիս ես տաքսիին, որ գումարը տանես տաս: Ասում եք՝ մենք սոցիալական պետություն ենք, բայց այս նախագիծն ընդունելով՝ մենք այդ սոցիալական պետության տրամաբանությանը հակասում ենք: Այն փողը, որ կարող էր գնալ այդ մարդկանց խնդիրները լուծելուն, տալիս ենք պետական ապարատին: Նման օրենք ընդունելով՝ մենք վնաս ենք տալիս համայնքների բյուջեներին»:
Տաթև ՀԱՐՈՒԹՅՈՒՆՅԱՆ
