Յուրի Խաչատուրովն այսօր չի եղել ԱԺ ապրիլյան պատերազմի հանգամանքները քննող հանձնաժողովի նիստում: Այս մասին նիստի ավարտից հետո լրագրողների հետ զրույցում ասաց հանձնաժողովի նախագահ Անդրանիկ Քոչարյանը:
Նա նաեւ ասաց, որ հասարակությանը հետաքրքրող «հայտնի պերսոնաժներին» հրավիրելիս`տեղեկություն կտրամադրեն: Թե ո՞վ է եղել հանձնաժողովի այսօրվա հյուրը, Անդրանիկ Քոչարյանը չասաց. «Մարդ, որը հարստացրեց մեր տեղեկատվությունը»:
Ավելի ուշ պարզ դարձավ, որ հանձնաժողովի հյուր է եղել այն ժամանակ առաջնագծում ծառայություն իրականացրած զինվոր: Հարցի այս ասպեկտը հանձնաժողովում կարեւորում են, քանի որ հենց այդ տղաներն են իրականում տեսել, թե ի՞նչ եւ ինչպե՞ս է կատարվում, վերապրել են իրենց ընկերների մահը: Հանձնաժողովում նրանց լսելը կարեւորում են նաեւ առաջիկայում համանման իրավիճակները կանխելու, բանակը ուժեղացնելու եւ ամրացնելու տեսանկյունից:
Հրավիրյալներին տրվող հարցաշարը կազմվում է անհատական` ելնելով հրավիրյալի կարգավիճակից, պատասխանատվության աստիճանից եւ այլն:
Կարդացեք նաև
Չորս ամիսների աշխատանքի արդյունքում Անդրանիկ Քոչարյանն ասաց, որ բավական աշխատանք են կատարել, նաեւ մտահոգիչ տեղեկություններ են ստացել:
Հանձնաժողովի գործունեության ժամկետը վեց ամիս է. կերկարաձգվի՞ այն, թե՞ ոչ, Անդրանիկ Քոչարյանը դեռ դժվարանում է ասել, սակայն արձանագրում է, որ սահմանափակ փորձագետների առկայությունը հնարավորություն չի տալիս հսկայական տեղեկատվության արագ եւ ամբողջական մշակման համար: Առայժմ խորհրդատուների ինստիտուտ են սահմանել: Խորհրդատուներից մեկն էլ Նորատ Տեր-Գրիգորյանցն է լինելու: Այժմ նա Սիրիայում է, կօգնի, երբ վերադառնա: Բարձրաստիճան զինվորականների օգնությունն, ըստ Անդրանիկ Քոչարյանի, լինելու է այն, որ սխալ եզրահանգումների վրա հանձնաժողովականները չշեղվեն: Խորհրդատվություններ են պետք լինելու նաեւ հետախուզության, հրետանու, ռազմաօգային ուժերի հարցերով:
Խորհրդատուների ցանկում են նաեւ Վաղարշակ Հարությունյանը, Վլադիմիր Հայրապետյանը: Հանձնաժողովը դիմել է ԱԱԾ, որպեսզի վերականգնվի այս անձանց գաղտնիության թույլտվության հնարավորությունը: Խոսքը տեղեկատվության հասանելիության մասին է: Անդրանիկ Քոչարյանը զարմացած է, որ գործընթացը ԱԱԾ-ում մի քիչ դանդաղել է եւ հրավիրյալները դեռ չեն կարողանում մասնակցել նիստերին: Նա վստահ է, որ առաջիկա նիստերին հրավիրյալները մասնակցություն կունենան:
«Բոլորին հրավիրելու ենք մեր հաստատած ցանկով`դեռ մի բան էլ ավել»,-ասաց Անդրանիկ Քոչարյանը` պատասխանելով բարձրաստիճան պաշտոնյաներին հանձնաժողով հրավիրելու հարցին: Ասաց՝ ակնկալում է, որ որեւէ հրավիրյալ չի մերժի ներկայանալ ապրիլյան պատերազմի հարցերին վերաբերվող հանձնաժողով. «Նույնիսկ Սերժ Սարգսյանին եմ ակնկալում, որ չի մերժի: Ավելին` նույնիսկ ակնկալել եմ, որ պաշտպանության նախկին նախարար Միքայել Հարությունյանը, եթե «մարտի 1-ով» լքեց Հայաստանը, ապա ապրիլյանով ինքը պետք է ձեւ գտնի`հանձնաժողովի հետ կոնտակտ կարողանա ապահովի, չգիտեմ, տեխնիկական ինչ-որ միջոցներով, սկայպով, որովհետեւ հարցեր կային, որ իրեն էլ պետք է ուղղեինք»:
Միքայել Հարությունյանն այդ ժամանակ նախագահին առընթեր գլխավոր ռազմական տեսուչն էր: Անդրանիկ Քոչարյանը հայտարարեց, որ նրա այդ ժամանակվա տեղակալն արդեն հրավիրվել է հանձնաժողով եւ շատ կարեւոր տեղեկատվություն է տրամադրել: Տեղեկատվության բնույթը նա չհրապարակեց:
Նելլի ԳՐԻԳՈՐՅԱՆ
