Վանո Սիրադեղյանի զարմիկը պատմում է՝ 73-ամյա հոր տունը 2008-ին խուզարկել են, կալանավորել ու ԱԱԾ մեկուսարանում պահել՝ ընտրություններին կեղծիքներ թույլ չտալու համար

Վանո Սիրադեղյանի եղբոր որդին՝ Սասուն Սիրադեղյանը բոլոր նրանց, ովքեր ՍԴ նախագահ Հրայր Թովմասյանի հոր տուն ԱԱԾ աշխատակիցների այցը համարում են կարմիր գիծը հատել կամ 37 թիվը, հիշեցնում է հոր 2008-ին ձերբակալությունն ու կալանավորումը:

Սասուն Սիրադեղյանն Aravot.am-ի հետ զրույցում պատմեց, թե ինչպես էին հորը՝ Սերյոժա Սիրադեղյանին կալանավորել 2008 թվականի փետրվարին, եւ պահել ԱԱԾ-ի մեկուսարանում: Սիրադեղյանն ասաց, որ հոր դեմ գործն ուղղակի «սարքած էր»:

«2008-ին փետրվարի 26-ին է եղել: Ընտրություններին հորաքրոջս տղան՝ Յուրա Մամյանը Նոյեմբերյանում Լեւոն Տեր-Պետրոսյանի շտաբի պետն էր, երկուսով էինք համակարգում աշխատանքները: Հորս եւ Յուրա Մամյանի ձերբակալության պատճառն այն էր, որ այդ ընտրատարածքում թույլ չէինք տվել որեւէ անօրինականություն: ՀՀԿ-ի համար դա մեծ «մինուս էր»: Նույն օրը ձերբակալել են հորս եւ հորաքրոջս ամուսնուն: Հայրս ապրում էր Կոթիում, ես դեռ 1983 թվականից այդ տան գրանցումից դուրս էի եկել: Հորս տան խուզարկության սանկցիան տվել էին իմ անունով: Հորաքրոջս ամուսինն էլ Նոյեմբերյանում էր բնակվում, նույն օրը առավոտ ժամը 5:30-6:00-ի սահմաններում, ինչի իրավունքը չունեին, մտել էին երկուսի տները ու երկուսին էլ նույն օրը ձերբակալել, հետո կալանավորել: Մտել էին իմ հայրական տուն, խուզարկել, առգրավել էին զենք՝ «ՏՈԶ», առանց պատրոնի: Բայց սկզբում պետական հեղաշրջման փորձ էին գրել հորս վրա: Հետո փոխեցին, դարձրեցին անօրինական զենք-զինամթերք պահել: Մենք բոլորս էլ պատերազմական գործողություններին մասնակցել ենք, չորս ախպեր էինք, չորսս էլ մասնակցել ենք կռվին: Սահմանամերձ գյուղ է, էդ կարգի զենք ում տանն ասես՝ որ չէր լինի, բա ինքնապաշտպանական գործողություններ էին»,-պատմեց Սասուն Սիրադեղյանը:

Նրա փոխանցմամբ՝ 2008-ին հայրը 73 տարեկան էր, 2 ամսից ավելի կալանավորված է եղել, սկզբում՝ ԱԱԾ-ում, հետո տեղափոխել էին «Նուբարաշեն» ՔԿՀ. «Դատարանի վճռով հայրս պայմանական վաղաժամկետով ազատվեց, բայց դատարանը վճռել էր 2 տարվա ազատազրկում: Հորաքրոջս ամուսնու՝ Յուրա Մամյանի տանից էլ ավտոմատի պատրոն էին գտել՝ առանց զենքի: 4 տարվա ազատազրկում էլ Յուրիկին էին տվել, էն ժամանակ նա 62 տարեկան էր: 2 տարի, թե՝ 2 տարի 6 ամիս էլ Յուրիկը նստեց, հետո 1/3-րդով ազատվեց»:

Կարդացեք նաև

Մի կողմ թողնենք, որ Փաշինյանը պարզունակ գրագողություն է անում Վանո Սիրադեղյանից: Խորքային խնդիրն այն է, որ հենց Փաշինյանն էր Հայաստանի ղեկավարը, որը հանուն «Պատմական Հայաստանի»՝ կործանման եզրին հասցրեց իրական Հայաստանը. Լևոն Զուրաբյան

• 12:04 12.04.2024

Կիմ Բալայան, Գուրգեն Եղիազարյան, Հարություն Սուքիասյան…Վանո Սիրադեղյանի գործով անցնող տուժողներից ոմանք մահացել են, ոմանք երկրից գնացել

• 20:22 03.04.2024

Կարո Եղնուկյանը՝ Նորքի ոստիկանության բաժին նռնակով ներխուժած անձանց ուղղորդված չլինելու եւ «5-րդ շարասյան կարկառուն ներկայացուցչի» դիտարկումների մասին

• 23:25 27.03.2024

Նելլի ԲԱԲԱՅԱՆ