Դեկտեմբերի 2-ին հյուսիս-արևելյան ուղղությամբ տեղակայված զորամասերից մեկի պահպանության տեղամասում հրազենային վիրավորումից մահացած ժամկետային զինծառայող Արթուր Աջամյանի ինքնասպանության մասին լրատվամիջոցների հրապարակումները փաստաբան Հայարփի Սարգսյանը իրականության հետ չհամապատասխանող տեղեկություններ է համարում:
«Կարծում եմ՝ վարույթ իրականացնող մարմինը շատ ճիշտ կանի հետաքրքրվի այդ հրապարակումներով: Չնայած՝ շատ են տարածված այդ վարկածները, այնուամենայնիվ, վարույթ իրականացնող մարմինը թող պարզի, թե որ աղբյուրից են նման տեղեկություն ստացել, որը չի համապատասխանում իրականությանը: Ելնելով Արթուր Աջամյանի ու հրազենային վիրավորում ստացած Դավիթ Հարությունյանի ստացած վնասվածքներից՝ ակնհայտ է, որ միմյանց միջեւ չի եղել տարաձայնությունները»,- Aravot.am-ին ասաց Արթուր Աջամյանի իրավահաջորդի ներկայացուցիչ Հայարփի Սարգսյանը:
Նա նաեւ հերքեց վարկածը, թե Աջամյանը վիրավորվել է հակառակորդի հետ փոխհրաձգության արդյունքում:
Փաստաբանի խոսքով՝ Աջամյանի վրա կան տարբեր վաղեմության բազմաթիվ վնասվածքներ՝այդ թվում նաեւ թարմ վնասվածքներ՝ կապտուկներ, քերծվածքներ ճակատին, մատներին:
Կարդացեք նաև
«Վիրավորը հայտնաբերվել է խրամատում, սպանվածը՝ փոսում, մահացածի ճակատից կրակած է, ծոծրակից դուրս է եկել, վերեւից ներքեւ, ինքը չէր կարող իրեն նման վնասվածք պատճառել»։
Հայարփի Սարգսյանը նաեւ հայտնեց, որ պատրաստվում է այցելել Երեւան տեղափոխված Դավիթ Հարությունյանին:
Արփինե ՍԻՄՈՆՅԱՆ
