Առողջապահության համաշխարհային կազմակերպության (ԱՀԿ) գլխավոր տնօրեն Թեդրոս Ադհանոմ Գեբրեյեսուսը « 9 ½ կորոնավիրուսի օրենքները» խորագրով անցկացվող Պետերբուրգյան իրավական առցանց ֆորումի լիագումար նիստին փաստեց՝ այսօր լրանում է 100-րդ օրը, երբ իրենք առաջին անգամ իմացան այն մասին, որ մի նոր վիրուս է ի հայտ եկել աշխարհում:
Հիշեցմանը՝ առողջապահության նախարար եղած ժամանակահատվածում իրեն հաջողվել է կտրուկ նվազեցնել տուբերկուլյոզի, մալարիայի, մանկական մահացությունների դեպքերի թիվը և հարցին՝ ինչպե՞ս է այժմ իրավիճակը, և այս հարցում իրավաբաններն օգնո՞ւմ են, թե՞ խանգարում, նա պատասխանեց. «Հիմնական սկզբունքն այն է, որ բոլոր սահմանափակումները պետք է կատարվեն՝ մարդու իրավունքների պաշտպանությունը հաշվի առնելով: Իրավունքի գերակայությունն այս համավարակի դեմ պայքարում լուրջ դերակատարություն ունի: Շատ դեպքերում պետք է ձերբազատվել կարանտինային հին մեթոդներից, մշակել նոր սցենարներ»:
Թեդրոս Ադհանոմ Գեբրեյեսուսի վստահեցմամբ՝ պայքարը կլինի արդյունավետ, եթե շրջանառության մեջ դրվող նորմերը, սահմանափակումները միանգամից ընդունվեն կառավարությունների կողմից և կատարվեն ողջ աշխարհով մեկ՝ սահմանված ժամկետներում:
ԱՀԿ գլխավոր տնօրենը կարևորեց երկրների կառավարությունների թափանցիկ աշխատանքը. «Պետք է կառավարությունները պարբերաբար տեղեկացնեն հասարակությանը, թե համավարակի կանխարգելման ինչ միջոցներ են ձեռնարկվում: Նաև պետք է վստահեցնեն քաղաքացիներին, որ հենց այս ճգնաժամն ավարտվի, նման սահմանափակումները կվերացվեն, և կյանքը բնականոն հուն կվերադառնա»:
Կարդացեք նաև
Նա մտահոգություն հայտնեց, որ այս օրերին տարբեր երկրներից ահազանգեր են ստանում ընտանեկան բռնությունների աճի միտումների մասին՝ կապված այն միջոցների հետ, որոնք ուղղված են տանը մնալուն. «Հատկապես երկրների կառավարությունները պետք է ուշադրություն դարձնեն այս միտումներին և կատարեն անհրաժեշտ քայլեր: Այս սահմանափակումներն արդեն լուրջ ազդեցություն են թողնում հասարակական կյանքի վրա: COVID-19-ը մեր հասարակությունը խաթարում է, սակայն այս համավարակը չի կարող մեր հիմքերը խաթարել: Մենք նաև այս ուղղությամբ աշխատում ենք փորձագետների հետ օրենսդրական ոլորտում»:
Ամփոփելով խոսքը՝ Թեդրոս Ադհանոմ Գեբրեյեսուսն ասաց. «Պատմությունը մեզ կդատի այն առումով, թե ինչ ենք արել կատարվածը կանխարգելելու համար, որ այն չկրկնվի: Այս համավարակը կանցնի, բայց միլիարդավոր մարդկանց մոտ կշարունակեն մնալ առողջական խնդիրները: Մենք պետք է մտածենք այս ուղղությամբ, որ միլիոնավոր մարդիկ բուժօգնություն ստանալու հնարավորություն չունեն: Մեր հիմնական նպատակն է անել այնպես, որ բոլոր մարդիկ ունենան բժշկական օգնություն ստանալու հնարավորություն»:
Տաթև ՀԱՐՈՒԹՅՈՒՆՅԱՆ
