Երևանի ընդհանուր իրավասության դատարանը ՀՀ սնանկության դատարանի դատավոր Արա Կուբանյանին կալանավորելու միջնորդությունը մերժեց:
Aravot.am-ի հետ զրույցում Արա Կուբանյանի պաշտպան Կրոմվել Գրիգորյանն ասաց, որ ուրախ է դատարանի այդ որոշման համար, քանի որ դատարանը հասկացել է իր պաշտպանյալը իրեն առաջադրված մեղադրանքի հետ կապ չունի:
Հիշեցնենք՝ հուլիսի 17-ին ԲԴԽ-ն համաձայնություն էր տվել դատավորներ Գևորգ Նարինյանի և Արա Կուբանյանի նկատմամբ քրեական հետապնդում հարուցելու մասին գլխավոր դատախազ Արթուր Դավթյանի միջնորդություններին: Ապա, ԱԱԾ-ն էր միջնորդություններ ներկայացրել դատարան՝ դատավորների նկատմամբ կալանավորումը որպես խափանման միջոց ընտրելու մասին:
Ըստ Արա Կուբանյանի շահերի պաշտպան Կրոմվել Գրիգորյանի, դատավորը չի ընդունում իրեն առաջադրված մեղադրանքը։
Կարդացեք նաև
Նրան մեղադրանք է առաջադրվել է Քրեական օրենսգրքի 308 հոդվածի 2-րդ մասի հատկանիշներով՝ պաշտոնատար անձի կողմից իր պաշտոնեական դիրքը ծառայության շահերին հակառակ օգտագործելը կամ ծառայողական պարտականությունները չկատարելը՝ շահադիտական, անձնական այլ շահագրգռվածությունից կամ խմբային շահերից ելնելով։
Գործը վերաբերվում է սնանկության վարույթում գտնվող բնակարանի վեճին: Մինչ Արա Կուբանյանի կողմից գործը վարույթ ընդունելը մեկ այլ դատավորի որոշմամբ, բնակարանը աճուրդի է հանվել: Դատավորի պաշտպանի պնդմամբ, իր պաշտպանյալին մեղադրում են սնանկության կառավարչի գործառույթների թերացման համար, մինչդեռ սնանկության կառավարիչը ցուցմունք է տվել՝ ասելով, որ զբաղվածության պատճառով չի կարողացել հաշվետվությունը ներկայացնել:
Փաստաբան Կրոմվել Գրիգորյանի պնդմամբ, Կուբանյանի գործը որևէ կերպ կապ չունի սնանկության դատարանի՝ այսօր առավոտյան արդեն կալանավորված դատավոր Գևորգ Նարինյանի գործի հետ, անգամ գաղտնալսումներով նման ապացույց չկան: Ըստ պաշտպանի, կապն այնքանով է, որ աճուրդի հանված բնակարանը, որը եղել է Կուբանյանի վարույթում, գնել է Նարինյանի մորաքրոջ որդին։
Նելլի ԳՐԻԳՈՐՅԱՆ
