«Անկախության սերունդ» հասարակական- քաղաքական երիտասարդական նախաձեռնությունն այսօր ցույց էր կազմակերպել`«Կա՞ ապագա Հայաստանում» խորագրով:
Նախաձեռնության անդամները պահանջներ ներկայացրեցին հայաստանյան քաղաքական-հասարակական բոլոր կառույցներին`իշխանական եւ ընդդիմադիր: Պահանջը հետեւյալն է`պատասխանել հարցին`Հայաստանում կա՞ ապագա, թե՞ ոչ: Եթե կա, ապա ո՞րն է իրենց պատկերացրած ապագան`ռազմավարական ծրագրերի տեսքով, որոնք պետք է լինեն չափելի եւ իրատեսական` հստակ ժամկետներով հիմնավորված: Պատերազմից անցել է չորս ամիս եւ երիտասարդների գնահատմամբ, ոչ մի քաղաքական ուժ վերլուծություն չի ներկայացրել, թե ի՞նչ վնասներ ենք կրել պատերազմի արդյունքում, իսկ առանց այդօրինակ թվային տվյալների, հնարավոր չէ հետպատերազմյան ճգնաժամի հաղթահարում:
«Անկախության սերնդի» անդամները «սպառնում են» թույլ չտալ քաղաքական ուժերին`տնտեսության հարցում առաջնորդվել իրենց «հեքիաթային ծրագրերով», իրատեսական ծրագրեր են ակնկալում կրթության, գիտության եւ մշակույթի ոլորտում, որը զարգացման հնարավորություններ կստեղծի: Ակնկալում են նաեւ գյուղատնտեսության ոլորտի զարգացման եւ պարենային անվտանգության, դատաիրավական համակարգի բարեփոխումների, բանակի վերականգնման եւ սպառազինության ծրագրեր:
Պահանջում են նաեւ կառավարման արդյունավետ ռեսուրսներով հետ բերել կորցրածը եւ հզորանալ, կառուցել ուժեղ պետություն`հիմնված ազգային գաղափարախոսության եւ պետական շահի վրա:
Կարդացեք նաև
Իրենք հավատում են, որ Հայաստանում ապագա կա եւ քաղաքական ուժերին կոչ են անումգործել պատասխանատվության զգացումով, իրենց գնահատմամբ`ոչինչ չտվող ցույցերից, միմյանց հասցեին հնչեցվող մեղադրանքներից անցնել մասնագիտական դաշտ եւ կերտել պետության վաղվա օրվա տեսլականները:
Հստակ պատասխաններ են պահանջում այն մասին, ինչպե՞ս են լուծելու Հայաստանի առաջ ծառացած խնդիրները:
«Ասում եք`մի արտագաղթեք. ասեք, թե ինչո՞ւ չարտագաղթենք»,- ասաց բանախոսներից մեկը:
Այլ մանրամասները`տեսանյութում
Նելլի ԳՐԻԳՈՐՅԱՆ
