Արցախյան ազատամարտի վետերան, Հայաստանում առաջին հետախուզական-դիվերսիոն հատուկ նշանակության ջոկատի հիմնադիր, ՈՄԱ հասարակական-ռազմահայրենասիրական կազմակերպության հիմնադիր-հրամանատար Վովա Վարդանովն այսօր անդրադարձել է Արցախի եւ Հայաստանի անվտանգային խնդիրներին, Սյունիքում եւ Հայաստանի սահմաններին հնարավոր զարգացումների հարցին:
«Տեղի ունեցող իրադարձությունները սյունիքյան չեն: Մեզ շեղում են՝ Սյունիք ասելով, որովհետեւ իրադարձություններ կան նաեւ Վայքում եւ Գեղարքունիքում: Ու հավատացեք՝ ոչ պակաս լկտի պահվածք է հակառակորդի, ավելի ճիշտ, արդեն՝ հարեւանի կողմից:
Սյունիք ներս մտնելը եղել է 2,5-3 կմ ու մինչեւ հիմա այնտեղ են: Մեր կազմակերպության, մեր գումարտակի ներկայացուցիչները արդեն մեկ շաբաթ Սյունիքում են: Ինչպես բոլորին են շեղում, նույնպես էլ մենք էինք շեղվել: Վերին Շորժային շատ քիչ ուշադրություն ենք դարձնում եւ Ջերմուկի այն հատվածին, որտեղ բնակավայր չկա, ինչը բավականին սխալ է:
Ցավոք, պետությունը, մեր ռազմական գերատեսչությունը կապիտուլյացիայից հետո դեռ լրիվ ուշքի չի եկել եւ չի կարողանում ժամանակին ու ադեկվատ պատասխանել: Սա ցավալի փաստ է: Այս փուլում մեր ՊՆ-ին, ռազմական գերատեսչությանը մաքսիմալ օգնություն է պետք ցույց տալ ոչ միայն մարդկանցով: Շատ հաճախ մենք փնովում ենք: Իհարկե, տեղին է եւ ինչքան էլ քննադատես, քար գլորես ՊՆ-ի ուղղությամբ, հասնում է: Բայց այն մերն է, չենք ուզում չէ՞ մեր ՊՆ-ն ոչնչացնել: Տեղ կա, որ քար գլորելու փոխարեն ձեռք մեկնել եւ օգնել է պետք: Եվ երբ դուրս կգա այդ կոլապսից, դրանից հետո առաջին քար գլորողներից մեկը ես կլինեմ:
Կարդացեք նաև
Որքանո՞վ կարեւոր են Սյունիքի իրադարձությունները: Եթե նայում եք, Մեծ եւ Փոքր Իշխանասարերը երեք հազար մետրից ավելի բարձունքներ են: Եվ ով իշխում է այդ բարձունքներին, նա մշտադիտարկում է անում այդ տարածաշրջանում: Ոչ միայն Սյունիքում, այլեւ Քարվաճառի զգալի հատվածում: Թուրքը հենց այնպես ոչ մի բան չի անում: Ի տարբերություն մեզ, նա մտածում է եւ մտածածը սիրում է իրականացնել:
Աշոտ ՀԱԿՈԲՅԱՆ
