«Պարոն Մանուկյան, քաղաքական գործչի անձնական հարաբերությունները քաղաքական բանավեճերի առարկա կարելի է դարձնել միայն այն ժամանակ, երբ անձնական հարաբերություններն ազդել են հանրային բարիքի վրա», – ԱԺ լիագումար նիստում այսօր դիմելով «Հայաստան» դաշինքից Գեղամ Մանուկյանին, որն ավելի վաղ մատնանշել էր, թե կուսակցական գործունեության ընթացքում քանի շեֆ է փոխել ՔՊ ղեկավար Հայկ Կոնջորյանը՝ ասաց վերջինս։
«Եթե դուք լինեք որեւէ մեկի քավորը կամ սանիկը, եւ նա ձեզ բիզնեսներում քվոտաներ տա, կամ մարդ սպանեք, եւ նա ձեզ չդատի․․․ ապա այդ ժամանակ կարելի է անձնական հարաբերություններ քննարկել», – նշեց Կոնջորյանը։
Նրա խոսքով․ «Շատ օրինակներ կան, երբ փեսաներն ու քավորները, վարորդների սիրուհիներն անձնական հարաբերություններն օգտագործել են հանրային բարիքի ոտնահարման համար։ Այդ դեպքում նոր կարելի է քննարկել նրանց անձնական հարաբերությունները։ Ես ձեր անձնական հարաբերությունների ոչ մի դրվագ չեմ կապիտալիզացնի այս ամբիոնից, քանի դեռ ձեր անձնական հարաբերությունները չեն ազդել ժողովրդի գրպանի վրա, օրենքի վրա եւ այլն։ Իմ կենսագրությունը հրապարակային է եւ չի ոտնահարել քաղաքացու շահերը»։
Լուիզա ՍՈՒՔԻԱՍՅԱՆ
