«Քաղաքացիական պայմանագիր» խմբակցության պատգամավոր Վահագն Ալեքսանյանն այսօր Ազգային ժողովում տեղի ունեցած հարց ու պատասխանի ժամանակ, արձագանքելով ԱԺ-ում տեղի ունեցած այսօրվա միջադեպերին, որի ընթացքում իշխանության եւ ընդդիմության պատգամավորները միմյանց վրա շշեր նետեցին, իրար քաշքշեցին եւ բռունցքներով հարվածեցին, ասաց՝ մենք ոչ մի պարագայում չենք ուզել, որ Բաղրամյան պողոտան կամ այլ պողոտաներ իրենց հատուկ բառամթերքով գան Ազգային ժողով ու մտնեն ձեր տներ, ձեր սենյակներ:
«Ընդդիմադիր խմբակցությունները առիթը բաց չեն թողնում՝ մեզ մեղադրելու Արցախը ծախելու մեջ: Ո՞նց եղավ, Արցախը ծախեցինք մենք, բայց միլիարդներն ունեցաք դուք, կոմբինատներն ունեցաք դուք, Արցախը ծախեցինք մենք, բայց ձեզ աշխատանքից հետո «յագուար», «բենթլի» ու «մայբախ» է սպասում, այդ ո՞նց եղավ: Ասում եք՝ սեւ ու սպիտակի ենք բաժանել: Երբ Ռոբերտ Քոչարյանի ժամանակ թոշակառուները ցույց էին անում ու ասում՝ մեր թոշակը 4 հազար դրամ է, բարձրացրեք, Ռոբերտ Քոչարյանի ընտանիքն այդ ժամանակ մեծ ունեցվածքի էր տիրապետում, դա սեւ ու սպիտակի բաժանո՞ւմ չէր»,-ասաց նա:
Սրան ի պատասխան տեղից արձագանքեց «Հայաստան» դաշինքի պատգամավոր Ագնեսա Խամոյանը, որին լռելու կոչ արեց ԱԺ նախագահ Ալեն Սիմոնյանը:
Վահագն Ալեքսանյանը շարունակեց. «Կարո՞ղ է Հայաստանի Հանրապետության քաղաքացիները չգիտեին, որ նրանց ավտոշարասյանը, եթե «աբգոն» անեիր, ոտքերդ կջարդեին, էդ սեւ ու սպիտակի բաժանո՞ւմ չէ»:
Կարդացեք նաև
ՔՊ-ական պատգամավորի խոսքով, ընդդիմությունն ամեն հարցում փորձում է «մանիպուլացնել» մեր քաղաքացիներին: Նա անդրադարձավ «Հայաստան» խմբակցության պատգամավոր Քրիստինե Վարդանյանի ասածներին, որ նախկին ղեկավարներն ինչ արել՝ չեն արել, Արցախը չեն հանձնել. «Այդ ինչ անել-չանելու մեջ մտնում է՝ կոռուպցիա են ստեղծել, բանակի համար սպառազինություն չեն առել, հարյուրավոր միլիոններ են տարել Պանամայի եւ այլ օֆշորներ, այնպես են արել, որ ժամկետային զինծառայողների թիվն անգամներով կրճատվել է: Ինչ արել՝ չեն արել, բայց Արցախը պահել են, շատ լավ տրամաբանություն է»:
Լուսինե ԲՈՒԴԱՂՅԱՆ
