Բերդի բազմագործառութային պետական քոլեջի բակում օրեր առաջ բացվել է Արցախյան 44-օրյա պատերազմի ընթացքում նահատակված հերոսների հիշատակը հավերժացնող «Լույսի և փառքի պուրակը»: Պուրակում տեղադրված հուշատախտակին գրված են Բերդի շրջանից անմահացած 31 նահատակների անունները, որոնցից 7-ը եղել են քոլեջի ուսանող։ Նրանցից յուրաքանչյուրի անունով պուրակում տեղադրվել է եղևնի։
Բերդի բազմագործառութային պետական քոլեջի տնօրեն Աննա Ավալյանը Aravot.am-ի հետ զրույցում նշեց, որ գաղափարը միանգամից չի ծնվել՝ ունենալ անկյուն, վայր, ուր կարող ես զրուցել հերոսների հավերժության խորհրդանիշ կանաչ եղևնիների հետ, որոնք, տարեցտարի վեր բարձրանալով, կազդարարեն ի լուր աշխարհի մեր տավուշցի հերոսների մասին։
Դեռևս պատերազմի օրերին, երբ քոլեջում ընթացել են շինարարական աշխատանքներ՝ մեղքի և դառնության զգացում է հետևել քոլեջի վերանորոգմանը։ Միայն վերջինիս ավարտին է որոշել տարածքում պուրակ հիմնել։ Քոլեջի ուսանողները յուրաքանչյուր օր հոգ են տանում ծառերի խնամքի մասին, իսկ զոհվածների հարազատները հաճախակի այցելում և ծաղիկներ խոնարհում՝ հուշաղբյուրի մոտ։ Աննա Ավալյանը հավելեց, որ շարունակելու է պուրակում ավելացնել ծառեր ու ծաղիկներ, որոնք անգամ ձմռան ցրտաշունչ օրերին զարմանալիորեն ծաղկում են։
Կարդացեք նաև
Լիա ՃԱՂԱՐՅԱՆ
Լուսանկարները՝ Բերդի համայնքապետարանի
