«Հետպատերազմյան և քովիդյան զբոսաշրջությունը Հայաստանում․ վերլուծություններ, կանխատեսումներ» թեմայով համաժողով, «Արի՜ գնանք Երևան» անվճար քաղաքային տուր քաղաքացիների համար. «Պրոֆեսիոնալ զբոսավարների հայկական ասոցիացիան» Զբոսավարների միջազգային օրվան ընդառաջ նվեր էր մատուցել բնակիչներին:
Քաղաքային տուրն իրականացվեց Երևանի քաղաքապետարանի մշակույթի և զբոսաշրջության վարչության աջակցությամբ: 200-ից ավելի քաղաքացիներ պրոֆեսիոնալ զբոսավարների աջակցությամբ հնարավորություն ստացան ծանոթանալ Երևան քաղաքի պատմությանը, հուշարձաններին, մշակութային և պատմական շինություններին:
Aravot.am-ի հետ զրույցում «Պրոֆեսիոնալ զբոսավարների հայկական ասոցիացիայի» վարչության անդամ Կատար Թասլակյանը հայտնեց՝ «Հետպատերազմյան և քովիդյան զբոսաշրջությունը Հայաստանում․ վերլուծություններ, կանխատեսումներ» թեմայով համաժողովը բաց է եղել բոլոր զբոսավարների, տուրիզմի ոլորտի ներկայացուցիչների՝ տուրօպերատորների, տրանսպորտի ընկերությունների ներկայացուցիչների համար: Համաժողովի ընթացքում ներկայացվեց վիճակագրություն, վերլուծություններ հետպատերազմյան և քովիդյան միտումների մասին, թե ինչպես պետք է փոխվեն, որ դաշտում դիմակայեն:
Համաժողովի ընթացքում նաև հարցերի միջոցով ներկայացվեցին վերափոխման մասին ուղիներ, կանխատեսումներ: Մեր հարցին՝ համաժողովի արդյունքներն ի՞նչ են վկայում՝ ո՞րն է հետքովիդյան և հետպատերազմյան շրջանում գլխավոր մարտահրավերը, ու ի՞նչ լուծման ուղիներ են մատնանշվում, Կատար Թասլակյանը պատասխանեց. «Մենք պետք է պատրաստ լինենք փոփոխությունների. եթե չենք ադապտացվում, պատրաստ չենք փոփոխությունների, ապա մենք չենք կարող ինտեգրվել ու շարունակել տուրիզմի ոլորտում գործունեությունը, քանի որ այդ ոլորտը հիմա փոփոխությունների է ենթարկվում»:
Խոսելով փոփոխությունների և նոր միտումների մասին՝ մեր զրուցակիցն ասաց. «Տարիքային շեմն է փոխվում և ծավալները. մեծաքանակ տուրիզմից, մեծաքանակ խմբերից ու 60+ տարիքից տուրիզմը դեպի երիտասարդացում է գնում: Արդեն 50- տարիքն է ու ավելի փոքր խմբեր, որոնց այցերն ավելի երկար կարող են լինել: Պետք է մտածել, վերափոխել ծրագրերն ավելի ժամանցային և արկածային, գիտական իմաստով, որպեսզի շուկան դիրքավորվի այդ տարիքային խմբին հետաքրքրող ծրագրերով»:
Մեր փաստմանը՝ զբոսաշրջության ոլորտը քովիդի և պատերազմի պատճառով շատ վնասներ կրեց, դրանք փոքր-ինչ հաղթահարվե՞լ են, թե՞ վնասները դեռ շարունակում են մեծ մնալ, Կատար Թասլակյանը պատասխանեց. «Վնասները շատ մեծ են, բայց ամեն դեպքում նախանշվում է, կանխատեսվում, որ 2023-ին կարող է զբոսաշրջային բում լինել, զբոսաշրջային մեծ աճ է կանխատեսվում ամբողջ աշխարհում: Այնպես որ, մենք պետք է պատրաստ լինենք, ավելի պատասխանատու, որ այդ հոսքերը ճիշտ օգտագործենք»:
Մեր զրուցակիցը փաստեց՝ ներքին տուրիզմը վերջին երկու տարում բավականին աճել է, քանի որ մարդիկ հնարավորություն չունեին ճամփորդելու և երկրի ներսում էին ճամփորդում: Հարցրին՝ քովիդի պատճառով շա՞տ զբոսաշրջային կազմակերպություններ են փակվել, զբոսավարներ փոխել ոլորտը, Կատար Թասլակյանը պատասխանեց. «Քովիդը շատ է ազդել ոլորտի վրա: Շատ զբոսավարներ ստիպված փոխեցին ոլորտը՝ գնացին ծրագրավորման ոլորտ, հավանաբար իրենցից շատերն այլևս չեն վերադառնա ոլորտ: Շատ տուրիստական ընկերություններ չդիմացան դժվարություններին, փակվեցին: Բայց մեր այսօրվա համաժողովի շրջանակում մենք ամեն դեպքում փորձեցինք մնալ դրական ալիքի վրա, քանի որ սա այն ոլորտն է, որտեղ մարդիկ նվիրված են երկրին, տուրիզմին: Ուզում ենք դրական երանգ դնել, որ դրական զարգացումներ ու միտումներ կան և փորձենք միասին հաղթահարել դժվարությունները, քանի որ միջոցառման կարգախոսն էր՝ միասին հաղթահարելով մարտահրավերները»:
Տաթև ՀԱՐՈՒԹՅՈՒՆՅԱՆ
Լուսանկարները՝ «Պրոֆեսիոնալ զբոսավարների հայկական ասոցիացիա»-ի
