«Աշնանացանի խնդիր ենք ունենալու, քանի որ պետությունը սերմնացուն չի սուբսիդավորում։ Էկոնոմիկայի նախարար Վահան Քերոբյանը Շիրակում ասում էր, որ արդյունավետ չի։ Այսինքն, գյուղացիներին հորդորում էր գյուղատնտեսությամբ չզբաղվել։ Փոխնախարարին ասացինք, որ սիլիտրայի սուբսիդավորման վրա սահմանափակում են դրել եւ գյուղացուն դրդել հանցագործության․ միայն երեք հեկտարի դեպքում կարելի է օգտվել, մարդիկ էլ ստիպված թղթերը կեղծում են, որ հող մշակեն»,-խորհրդարանում լրագրողների հետ զրույցում այսօր հայտարարեց շիրակցի մի ֆերմեր, որը հրավիրված էր մասնագիտական քննարկման։
Նա հարցադրում արեց՝ եթե սերմացուն չսուբսիդավորեն, գյուղացին որտեղի՞ց գնի․ «Հիմա չկա սերմացու։ Ցավալի է, որ նախարարը կանգնում ասում է, որ չպետք է սերմացուն սուբսիդավորեն։ Առաջ 150 դրամ էր գարին, հիմա՝ 300: Մի բան էլ հորդորում է անմշակ հող չթողնել։ Վարչապետին էլ ԱԺ-ում հարց են տալիս, մատ է թափ տալիս։ Զգուշացնում եմ, որ նման արտահայտություններ չանեն»։
Տղամարդն ասաց, որ գյուղացին խնդրի առաջ է, ջուր էլ չունեն ոռոգելու․ «Ջուրը լցնում են Ախուրյանի ջրամբարը, որտեղից սնում են Թուրքիային։ Մի ամիս հետո ջրի խնդիր կունենանք, մինչդեռ Թուրքիան է օգտվում այդ ջրից։ Մարզպետն ու մարզպետի տեղակալն ասում են, որ ջուրը սառում է։ Անգրագետ պետք է լինես․ հոսող ջուրը չի սառում․․․սրանց ի՞նչ ասես։ Հոսող ջուրը ո՞նց կարող է սառել։ Մի հատ լավ հայկական բառ կա՝ մուտիլովչիկ։ Սրանք մուտիլովչիկ են։ Այս մարդիկ Հայաստանը դատարկելուն են միտված»։
Լուիզա ՍՈՒՔԻԱՍՅԱՆ
