«Արցախին գումար բերողն այսօր Արայիկ Հարությունյանը չէ: Եթե նա գլուխ է գովում, որ դա իր ճկունությունն է, ապա այդտեղ ճկունության գործոն չկա: Այսօր Հայաստանի իշխանությունը Արցախին գումար է տալիս, որպեսզի մարդիկ հանկարծ Արցախից չգան Հայաստան, բողոքի ձայն չբարձրացնեն»,-այսօր կարծիք հայտնեց ԱԺ «Պատիվ ունեմ» խմբակցության պատգամավոր Տիգրան Աբրահամյանը՝ «Հայելի» ակումբում՝ խոսելով 44-օրյա պատերազմից հետո Հայաստանում եւ Արցախում ստեղծված իրավիճակի մասին:
Ըստ պատգամավորի, ՀՀ իշխանությունը փորձում է սոցիալական առումով ստեղծել կախվածություն, որպեսզի դա կարողանա քաղաքական առումով օգտագործել. «Եվ այդտեղ Արայիկ Հարությունյանի դերը զրոյական է: Մյուս կողմից կա իրավիճակ, որ այն քաղաքական ուժերը, այն մարդիկ, որոնք մեղսակից են համարում նաեւ Արայիկ Հարությունյանին, Արցախում իշխանություն փոխելն այս պահին բավականին մշուշոտ են համարում, որովհետեւ ներկայումս կա խնդիր՝ ընտրությունների անցկացման: Մյուս կողմից էլ զուգահեռ գնում է սահմանադրական բարեփոխումների գործընթացը, որը հետագայում որոշակի ճկունություն է ապահովելու հրաժարականի կամ մեկ այլ դեպքում՝ նախագահի կամ խորհրդարանի փոփոխության մասով»:
Տիգրան Աբրահամյանի կարծիքով, առաջիկա երկու տարվա ընթացքում Արցախում ստեղծվելու է խոշոր փոփոխություն անելու հնարավորություն: Նա Ադրբեջանի շտապողականությունը պայմանավորում է հենց այս հանգամանքով:
«Որքան շուտ Նիկոլ Փաշինյանը հեռանա իշխանությունից՝ այնքան հայ ժողովրդի գործելու հնարավորությունները մեծանալու են»,-ասաց պատգամավորը՝ նշելով, որ նրանց իշխանության օրոք, Ադրբեջանը չի իրականացնում ստանձնած պարտավորությունները:
Կարդացեք նաև
«Այսօր նաեւ, ցավոք, Բերձորի հարցն է առաջին պլան բերված եւ Ադրբեջանի փոխանցմամբ, դա մինչեւ տարեվերջ պետք է տեղի ունենա: Նոյեմբերի 9-ի փաստաթղթում նշված է այլընտրանքային ճանապարհ, սակայն որտեղով է անցնելու այդ ճանապարհը՝ դա կախված էր Հայաստանի իշխանություններից, սակայն նրանք այսօր մի կողմ են քաշված եւ դա թողել են Ադրբեջանի որոշումների տիրույթում: Եվ Ադրբեջանը իրագործում է այն ծրագրերը, որոնք ինքն է ցանկանում եւ որը համարում է, որ տեղավորվում է նոյեմբերի 9-ի փաստաթղթում»:
Լուսինե ԲՈՒԴԱՂՅԱՆ
