Մարտի 6-ի,ժամը 11:00-ի դրությամբ Հայաստանում գրանցվել է կարմրուկի 20 դեպք, որից 19-ը հոսպիտալացված է, 1-ը՝դուրս է գրվել։ Այս մասին այսօր հրավիրված ասուլիսում ասաց առողջապահության նախարար Անահիտ Ավանեսյանը։
Նրա խոսքով՝ բոլոր բուժառուների վիճակը միջին ծանրության է։ Նրանք գտնվում են խիստ հսկողության տակ։ Ընդհանուր հիվանդներից 15-ը երեխա են, 5-ը՝ մեծահասակ։
Նախարարն ասաց, որ 2022-ից սկսած՝ մեր տարածաշրջանում, ԱՀԿ 27 երկրներում այս հիվանդացության աշխուժացում կար, եւ կանխատեսվում էր, որ այն մեր երկիր էլ կներթափանցի․ «Մեր համաճարակաբանական ընդհանուր հսկողության եւ հետազոտության արդյունքները ցույց են տալիս, որ առաջին դեպքը Հայաստան է ներթափանցել արտերկրից, հիվանդացել է բալիկ, որից հետո վարակվել են նաեւ այլ անձինք»։
Մեր երկրում, ինչպես ասաց նախարարը, ԿԿԽ (կարմրուկ, կարմրախտ, խոզուկ) պատվաստումների ցուցանիշը շատ բարձր է՝ 95%, սակայն, ըստ նախարարի՝ կա 5%, որը չունի պաշտպանություն այս վարակից։ Կարմրուկը փոխանցվում է օդակաթիլային ճանապարհով, ունի բարձր վարակելիություն, ուստի պատվաստումները շատ կարեւոր են եւ միակ պաշտպանիչ միջոցն են։
Կարդացեք նաև
Հայաստանում ԿԿԽ պատվաստումներն իրականացվում են երկու դեղաչափով․ առաջինը՝ 1 մեկ տարեկան երեխաներին, երկրորդը՝ 4-6 տարեկաններին։
«Երկու դեղաչափով պատվաստված լինելու դեպքում վարակման հավանականությունը գրեթե բացակայում է։ Այժմ պոլիկլինիկաների հետ ենք աշխատում՝ վերհանելու պատվաստումները բաց թողած բնակչության ցուցակները։ Նրանց հետ անհատապես աշխատում ենք, որպեսզի պատվաստվեն ու կանխեն ռիսկի խմբի վարակումը, որոնք չեն կարող պատվաստվել, դրանք 1 տարեկանից ցածր բալիկներն են»,-ասաց նախարարը։
Նելլի ԲԱԲԱՅԱՆ
