ԵՄ խորհրդի նախագահ Շառլ Միշելը հայտարարություն է տարածել Վրաստանում «Օտարերկրյա ազդեցության թափանցիկության մասին» օրենքի ընդունման վերաբերյալ, որում ասվում է. «Երեքշաբթի Վրաստանի խորհրդարանն առաջին ընթերցմամբ ընդունեց «Օտարերկրյա ազդեցության թափանցիկության մասին» օրենքը: Դա շատ վատ իրադարձություն է Վրաստանի և նրա ժողովրդի համար:
Օրենքը ներկա տեսքով ամենախայթիչ ազդեցությունը կունենա նրա քաղաքացիական հասարակության և զանգվածային լրատվամիջոցների վրա և բացասական ազդեցություն կունենա բազմաթիվ վրացիների վրա, որոնք օգուտ էին ստանում իրենց աշխատանքից: Այդ օրենքը չի համապատասխանում ԵՄ արժեքներին և չափանիշներին: Այն հակասում է Վրաստանի՝ Եվրամիություն մտնելու հայտարարված նպատակներին, որին սատարում է Վրաստանի քաղաքացիների ճնշող մեծամասնությունը: Դրա վերջնական ընդունում լուրջ հետևանքների կունենա մեր հարաբերությունների վրա:
ԵՄ-ը կոչ է անում Վրաստանին կատարել իր խոստումները և նպաստել ժողովրդավարությանը, օրենքի գերակայությանը և մարդու իրավունքների պաշտպանությանը և հիշեցնում է մարդկանց՝ խաղաղ ցույցեր անցկացնելու իրավունքի մասին»:
Ավելի վաղ նմանատիպ հայտարարություն տարածել էր Վրաստանում ԱՄՆ դեսպանատունը:
Կարդացեք նաև
«Այսօր մութ օր է Վրաստանի ժողովրդավարության համար. խորհրդարանի կողմից Կրեմլից ոգեշնչված այս օրենքների առաջխաղացումը անհամատեղելի է Վրաստանի ժողովրդի՝ եվրաինտեգրման և նրա ժողովրդավարական զարգացման հստակ ցանկության հետ: Այս օրենքներով առաջնորդվելը կվնասի իր ռազմավարական գործընկերների հետ Վրաստանի հարաբերություններին և կխաթարի վրացական շատ կազմակերպությունների կարևոր աշխատանքը, որոնք աշխատում են իրենց համաքաղաքացիներին օգնելու համար: Գործընթացը և օրինագծերը իրական հարցեր են բարձրացնում իշխող կուսակցության՝ եվրաատլանտյան ինտեգրմանը հանձնառությունների վերաբերյալ»,- ասվում է հայտարարության մեջ:
Երեկ երեկոյան Վրաստանի խորհրդարանն առաջին ընթերցմամբ ընդունեց «Օտարերկրյա ազդեցության թափանցիկության մասին» օրենքը, որը գրեթե կրկնում է Ռուսաստանի նմանատիպ օրենքը: Մինչ խորհրդարանում ընթանում էին օրենքի ընդունման քննարկումները, բազմահազար ցուցարարներ Եվրամիության դրոշներով հավաքվել էին խորհրդարանի շենքի մոտ:
Օրենքի ընդունումից հետ բախումներ սկսվեցին ցուցարարների և ոստիկանների միջև: Որոշ տեղեկություններով ցուցարարները «Մոլոտովի կոկտեյլներ» են նետել ոստիկանների ուղղությամբ: Ոստիկանությունն արցունքաբեր գազ և ջրցան մեքենաներ է գործադրել:
Պատրաստեց Վիկտորյա ԱՆԴՐԵԱՍՅԱՆԸ
