«Պարզ է, որ դատախազությունն ուզում է իր կարած գործն ավարտին հասցնի, բայց հաջորդ նիստին կլսեք նաեւ պաշտպանների առարկությունները»,- այսօր «Դիզվառելիքի գործով» նիստի ավարտից հետո, լրագրողների հետ զրույցում ասաց ՀՀ պաշտոնաթող նախագահ Սերժ Սարգսյանը:
«Դիզվառելիքի գործով» նիստում այսօր պաշտպանական կողմը միջնորդություն ներկայացրեց նաեւ Սերժ Սարգսյանի նկատմամբ խափանման միջոցը փոխելու մասին: Հիշեցնենք, նրա նկատմամբ, դեռ նախաքննության փուլում, կիրառվել էր հանրապետությունից չհեռանալու մասին ստորագրությունը, որը հետագայում ևս մնացել էր ուժի մեջ: Պաշտպանական կողմի դիտարկմամբ՝ այս ընթացքում Սերժ Սարգսյանը դրսեւորել է պատշաճ վարքագիծ՝ չխուսափելով եւ որեւէ կերպ չխոչընդոտելով քննությանը, նաեւ գործը մտել է վերջին փուլ, որտեղ գործի քննությանը խոչընդոտելու կամ քննությունից խուսափելու որեւէ պատճառաբանություն անիմաստ է լինելու: Բացի այդ, Սերժ Սարգսյանն ի սկզբանե մերժել է վաղեմության ժամկետի հիմքով հակընդդեմ հայցի ներկայացումը, իսկ մեղադրող դատախազն իր ճառում այսօր պահանջեց նրան մեղավոր ճանաչել՝ ազատելով պատժի կիրառումից՝ վաղեմության ժամկետի հիմքով:
Դատախազն առարկեց՝ չընդունելով պաշտպանի ներկայացրած փաստարկները: Նա պնդեց, որ ընտրված խափանման միջոցը դեռեւս պիտանի է եւ անհրաժեշտ է:
Միջնորդության վերաբերյալ որոշումը դատարանը կհրապարակի այսօր՝ 17.30-ին:
Կարդացեք նաև
Այլ մանրամասները՝ տեսանյութում
Հիշեցնենք, Երեւանի ընդհանուր իրավասության քրեական դատարանի Ավան եւ Նոր-Նորք նստավայրում, դատավոր Վահե Միսակյանի նախագահությամբ, այսօր շարունակվեց «Դիզվառելիքի գործով» դատավարությունը:
Հիշեցնենք, որ այդ գործով ՀՀ երրորդ նախագահ Սերժ Սարգսյանին մեղադրանք է առաջադրված առանձնապես խոշոր չափերով յուրացման/վատնման համար․ ըստ մեղադրանքի, նրա կազմակերպմամբ եւ «Ֆլեշ» ընկերության սեփականատեր Բարսեղ Բեգլարյանի դրդմամբ՝ 2013թ․ հունվարից մինչեւ փետրվարը կառավարության պահուստային ֆոնդից վատնվել է պետական աջակցության ծրագրերի իրականացման ընթացքում 15 391 765 լիտր դիզելային վառելիքի համար հատկացված սուբսիդիայի առանձնապես խոշոր չափերով գումարը՝ 489 160 310 ՀՀ դրամ: Այս գործով մեղադրյալի կարգավիճակում էին նաեւ ՀՀ գյուղատնտեսության նախկին նախարար Սերգո Կարապետյանն ու նրա տեղակալ Սամվել Գալստյանը, որոնց նկատմամբ քրեական հետապնդումը դադարեցվել է․ նախկին պաշտոնյաները մահացել էին կորոնավիրուսից։
Նելլի ԳՐԻԳՈՐՅԱՆ
