«Այս տարվա դեկտեմբերը, ինչպես եւ կանխատեսվել էր, եղավ անոմալ տաք, օդի ամսական միջին ջերմաստիճանը նորմայից բարձր է 5-6 աստիճանով, մենք ունեցանք նաեւ կլիմայական ռեկորդներ: Երրորդ տասնօրյակում Արարատյան դաշտում օդի ջերմաստիճանը հասավ մինչեւ 16-17,5 աստիճանի»,- այսօր «Արմենպրեսի» լրատվական կենտրոնում կայացած մամուլի ասուլիսի ժամանակ ասաց «Հիդրոօդերեւութաբանության եւ մոնիթորինգի կենտրոնի» տնօրենի տեղակալ Գագիկ Սուրենյանը` նշելով, որ վերջին 100 տարում ցերեկային ժամերին դիտված այս ջերմաստիճանով այս դեկտեմբերը ամենատաքն է, պատմական տաք ամիս է եղել:
Առաջիկա օրերին էլ օդի ջերմաստիճանը շարունակելու է կլիմայական նորմայից բարձր մնալ մոտ 6-8 աստիճանով. «Առաջիկա օրերին այդ օդային տաք հոսանքները չեն նահանջելու: Մինչեւ հունվարի 5-6-ը ներառյալ մենք գտնվելու ենք այդ տաք օդային գոտում, անոմալ բարձր ջերմային ֆոնը պահպանվելու է, եւ հանրապետության ողջ տարածքում հաստատվելու է առանց տեղումների եղանակ: Ուժեղ քամիներ, գետնաբուք առաջիկա 5 օրերին չենք սպասում»:
Հունվարին էլ լինելու է տաք եղանակ, օդի հարաբերական միջին ջերմաստիճանը նորմայից բարձր է լինելու 3-5 աստիճանով, տեղումների քանակը լինելու է նորմային մոտ. «Մենք ունենալու ենք նորից անոմալ տաք եւ բավարար տեղումներով հունվար»:
Հիդրոօդերեւութաբանության եւ մոնիթորինգի կենտրոնի» տնօրեն Լեւոն Ազիզյանն ասաց, որ Սեւանա լճի մակարդակը ցածր է անցյալ տարվա ցուցանիշից 11 սմ-ով:
Կարդացեք նաև
Հռիփսիմե ՋԵԲԵՋՅԱՆ
