Խստիւ Կը Դատապարտենք ՀՀ իշխանութիւններու անարգական եւ անպատկառ վերաբերմունքը. պարտին հայցել ներողութիւն
Հայ ժողովուրդի պատմութեան ամէնատժգոյն այս օրերուն, մինչ հայրենաբնակ թէ աշխարհասփիւռ ամբողջ հայութեան մէջ կոչեր կը հնչեն որպէսզի համազգային ներդաշնակութիւն եւ միասնականութիւն ստեղծող նախաձեռնութիւններ կատարուին, ծանր սրտով եւ խորազգաց ցասումով ստացանք անհաւատալի թուացող սակայն իրաւ լուրը, թէ ՀՀ հանրային պաշտօնական Հ1 հեռատեսիլի ընկերութեան տնօրէնութիւնը, Հայաստանեայց Առաքելական Սուրբ Եկեղեցուոյ Մայր Աթոռին ուղղուած իր գրութեամբ կը մերժէ սփռել աւանդութիւն դարձած Ամանորեան ուղերձը Ամենայն Հայոց Կաթողիկոս՝ Գարեգին Բ. Վեհափառին:
Բնականաբար անպատասխանատու եւ անպատկառ վերաբերմունք մըն է սա, որ ո՛չ միայն անարգանք է Հայ ժողովուրդի դարաւոր հաւատքի կեդրոն՝ Մայր Աթոռին եւ անոր գահակալին, այլ նաեւ անարգանք մըն է շպրտուած Հայ եկեղեցուոյ միլիոնաւոր զաւակներուն դէմքին:
Առ այժմ, առանց յաւելեալ մեկնաբանութեանց, կը պահանջենք ՀՀ Հանրային Հեռուստաընկերութիւնը հովանաւորող ՀՀ իշխանութիւններէն անյապաղ եւ հրապարակային ներողութիւն հայցէ Մայր Աթոռէն, ինչպէս նաեւ Հայ ժողովուրդէն իրենց անընդունելի եւ անարգական պահուածքին համար:
Կարդացեք նաև
ՌԱԿ-ի Համադրուած Մամուլ
