Երկու կողմն էլ՝ Հայաստանն էլ, Ադրբեջանն էլ իրավական խնդիրներ տեսել են, եւ դրանք ներկայացրել են մյուս կողմին, երկու կողմն էլ տվել են համապատասխան բացատրություններ, եւ որքան Ադրբեջանն է այդ խնդիրը տեսել, նույնքան էլ Հայաստանն է Ադրբեջանի ուշադրությունը հրավիրել այդ խնդրին՝ սկսած իրենց Սահմանադրությունից։
Այս մասին այսօր հրավիրված ասուլիսում ասաց ՀՀ ԱԳ նախարար Արարատ Միրզոյանը՝ պատասխանելով հարցին՝ Բաքուն պահանջում է ՀՀ Սահմանադրությունից հեռացնել Անկախության հռչակագրին հղումը, որտեղ հիշատակում կա ԼՂ-ի մասին, եթե այդպես է, եւ եթե Բաքուն նման խնդիր է տեսնում, արդյո՞ք Հայաստանն Ադրբեջանի Սահմանադրությունում, որտեղ հղում կա իրենց անկախության ակտին, եւ որտեղ հայտարարվում է, որ առաջին հանրապետության ժառանգն է այսօրվա Ադրբեջանը, այլ սահմաններով պետություն է։
Անդրադառնալով Փաշինյանի հայտարարությանը՝ «Հայաստանի Հանրապետությունը կարիք ունի նոր Սահմանադրության, ոչ թե Սահմանադրական փոփոխությունների, այլ նոր Սահմանադրության, որը ՀՀ-ն ավելի մրցունակ եւ ավելի կենսունակ է դարձնում աշխարհաքաղաքական եւ ռեգիոնալ նոր պայմաններում․․․», Միրզոյանն ասաց՝ իմ ընկալմամբ, սա մի փաստաթուղթ է, որը բացի կոնկրետ իրավահարաբերություններ եւ մեխանիզմներ ամրագրելուց, առաջին հերթին փիլիսոփայական հենքն է, որով կառուցվում են հասարակության,պետության ներսում իրավահարաբերությունները, քաղաքացի-քաղաքացի, քաղաքացի-պետություն եւ այլն։
«Սա, առաջին հերթին ներքին նշանակություն ունեցող փաստաթուղթ է։ Չեմ ուզում ամբողջովին մերժել, որ, ներքին նշանակություն ունենալով հանդերձ, ինչպես ցանկացած սահմանադրություն, ավելի լայն ազդեցություն ունի եւ ավելի լայն կապեր ունի, այսինքն, անդրադառնում է նաեւ արտաքին հարաբերությունների վրա։ Այս առումով, մեր Սահմանադրությունը բացառություն չէ, Ադրբեջանի Սահմանադրությունն էլ բացառություն չէ։ Բայց ասել, որ Հայաստան-Ադրբեջան հարաբերությունների կարգավորման գործընթացն է Սահմանադրության փոփոխության պատճառ, չափազանցություն կլինի»։
Կարդացեք նաև
Պատասխանելով հարցին՝ արդյոք գործող Սահմանադրությունն է արգելակում խաղաղության գործընթացը,Միրզոյանն ասաց՝ ամենեւին ոչ։
Նելլի ԲԱԲԱՅԱՆ
