Երևանի ընդհանուր իրավասության քրեական դատարանում դատավոր Ժորա Չիչոյանի նախագահությամբ,ավարտվել է ԱԳ նախարար Արարատ Միրզոյանի ծեծի գործով դատաքննությունը: Փաստաբան Ալեքսանդր Կոչուբաեւն այսօր ներկայացրեց պաշտպանական ճառը:
Հիշեցնենք, որ մեղադրյալի կարգավիճակում է «MMA» չեմպիոն Թորգոմ Ասատրյանը, որը մեղադրվում է Արարատ Միրզոյանի նկատմամբ սպանության փորձ կատարելու մեջ:
-Մեղքը չի կարող ծնվել աղմուկից, իսկ այս քրեական գործով Թորգոմ Ասատրյանի մեղքը ծնված է բացառապես այդ աղմուկից: Ճշմարտությունը չի կարող ծնվել խուճապից, իսկ մինչդատական վարույթի ընթացքում ճշմարտություն ստեղծվել է, այն չի ձեւավորվել բնականոն ընթացքում,-իր պաշտպանական ճառն այսպես սկսեց Կոչուբաեւը:
Իր ճառում նա ընդգծեց մի քանի հանգամանք, որոնք քրեական վարույթով առանցքային են. «Արդյո՞ք տեղի է ունեցել սպանության փորձ, թե՞ օրինակ մեկ այլ հանցակազմով նախատեսված արարքի կատարում: Ինչո՞ւ է մինչդատական վարույթ իրականացրած մարմինը քննարկել բացառապես մեկ հանցակազմի առկայություն:
Կարդացեք նաև
Մասնավորապես՝ մենք ունեինք օրինակ զանգվածային անկարգության մասնակցի կողմից բռնություն կատարելու հանցակազմ: Սա այն պարագայում, երբ մինչդատական վարույթ իրականացրած մարմնի՝ վարկածի Թորգոմ Ասատրյանը տնից դուրս էր եկել, որ մասնակցեր զանգվածային անկարգությունների: Մեղքը ծնվել է բացառապես խուճապից, բացառապես տուժող Արարատ Միրզոյանի անձով պայմանավորված, որովհետեւ հավասար այլ պայմաններում այս հանցակազմի կիրառելիությունը պետք է բացառվեր»:
Փաստաբանը նաեւ դատարանին ներկայացրեց իր պաշտպանյալի օրինակելի վարքագիծը, որ որեւէ արարքով չի ստվերվել նրա դատավարական վարքագիծը, ապա խնդրեց, որ եթե դատարանը պետք է կայացնի մեղադրական վերդիկտ, ապա լուծի Ասատրյանի խափանման միջոցի հարցը՝ կիրառելով այլընտրանքային խափանման միջոց: Փաստաբանը նաեւ խնդրեց հետաձգել նիստը՝ հնարավորություն տալով Ասատրյանի պաշտպանությունը շարունակի փաստաբան Արա Զաքարյանը:
Արփինե ՍԻՄՈՆՅԱՆ
