Բաթումում մեկնարկել է շախմատի Եվրոպայի տղամարդկանց եւ կանանց թիմային առաջնությունը, որին մասնակցում են նաեւ Հայաստանի տղամարդկանց (Շանթ Սարգսյան, Ռոբերտ Հովհաննիսյան, Հայկ Մարտիրոսյան, Գաբրիել Սարգսյան, Արամ Հակոբյան) եւ կանանց (Լիլիթ Մկրտչյան, Մարիամ Մկրտչյան, Էլինա Դանիելյան, Մարիա Գեւորգյան, Սուսաննա Գաբոյան) հավաքականները:
Երեկ ուշ երեկոյան ավարտված առաջին տուրում մեր տղաները 2,5:1,5 հաշվով հաղթել են Լիտվայի հավաքականին, իսկ աղջիկները նույն հաշվով պարտության են մատնել Էստոնիայի ընտրանուն:
Այսօր կայանալիք երկրորդ տուրում տղամարդկանց թիմը, որի մարզիչը Արման Փաշիկյանն է, խաղալու է Խորվաթիայի հետ, իսկ աղջիկների (մարզիչ՝ Զավեն Անդրիասյան) մրցակիցը լինելու են ռումինուհիները:
Աշոտ ՀԱԿՈԲՅԱՆ
