«Բոլոր այն դեպքերում, երբ նյութական շահագրգռվածությունը չի ազդում անձի ազատ կամքի վրա։ Այսինքն՝ այն դեպքերում, երբ անձը ցանկանում է մասնակցել հավաքի, սակայն դրա համար պետք են որոշակի նյութական պայմաններ՝ տրանսպորտ, սնունդ, կեցություն և այլն, այդ բոլոր դեպքերը չեն կարող համարվել քրեորեն պատժելի կամ նյութապես շահագրգռել։ Հետևաբար, նախաքննական մարմինները չեն կարող ու չպետք է այդ դեպքերում իրականացնեն նախաքննություն»,- Aravot.am-ի հետ զրույցում ասաց փաստաբան Վահե Գրիգորյանը՝ անդրադառնալով Սահմանադրական դատարանի այսօրվա որոշմանը։
Սահմանադրական դատարանի այս որոշումը վերաբերում էր ԱԺ պատգամավորների 1/5-րդի դիմումին, որով պատգամավորները վիճարկում էին ՀՀ Քրեական օրենսգրքի 236-րդ հոդվածի 2-րդ մասի (հավաքներին նյութապես շահագրգռել)՝ Սահմանադրությանը համապատասխանության հարցը։
Ըստ պատգամավորների ներկայացուցիչ Վահե Գրիգորյանի՝ «Հաշվի առնելով Սահմանադրական դատարանի որոշումը՝ հարուցված գործերը պետք է կարճվեն, իսկ դատարանում գտնվող գործերը, ըստ էության, արդարացման հիմքով պետք է ավարտվեն»։
Արփինե ՍԻՄՈՆՅԱՆ
