«Բոլորին դեմ եմ» կուսակցության վարչապետի թեկնածու Նինա Կարապետյանցն իր քաղաքացիական պարտքը կատարեց Շևչենկոյի անվան թիվ 42 ավագ դպրոցում տեղակայված 9/20 ընտրատեղամասում: Նա ասաց, որ մեծ սպասումներով է եկել ընտրության:
«Ես նաև սովորել եմ Շևչենկոյի անվան դպրոցում, այնպես որ այս տարածքն ինձ համար հարազատ է և միշտ հաջողություն է բերել: Վստահ եմ, որ այս անգամ էլ հարազատ վայրը ինձ և մեր թիմին բերելու է հաջողություն»,- ասաց նա:
«Վստահ եմ, որ մենք ունենալու ենք փոփոխություն, համակարգի փոփոխություն, քաղաքական սերնդափոխություն, այն, ինչի կարիքը ունեինք վաղուց, բայց տեղի չէր ունենում: Մենք ունենալու ենք ատելության խոսքի դադարեցում, համերաշխություն…
Սա այն է, ինչին ձգտել ենք և հանուն ինչի պայքարել ենք… Թիմը, որ հավաքվել է, բոլոր շանսերն ունի մինչև վերջ տարբեր սերունդների համերաշխության ներքո գնալ փոփոխությունների և ստանալ այդ փոփոխությունները»,- նշեց Կարապետյանցը:
Կարդացեք նաև
Ինչ վերաբերում է որևէ ուժի հետ համագործակցության վերաբերյալ հարցին, այսպես արձագանքեց. «Մեր առաջարկը ի սկզբանե եղել է անփոփոխ, մենք ասել ենք, որ բացառապես գործելու ենք միայն մեր պրոյեկտի և մեր վարչապետի թեկնածուի շուրջ, ընդամենը 100 օրով իշխանության ենք գալու, որը հնարավորություն է տալու մնացած բոլորի հետ կապված խնդիրները լուծել, հետևաբար որևէ մեկին ձայն տալու տեսակետից, իհարկե, դա չի լինելու, որովհետև ի վերջո պետք է լինի մի կուսակցություն, որը նախընտրական փուլում տրված խոստումները մինչև վերջ պետք է իրականացնի: Գոնե մենք այդպես ենք վարվելու այս պարագայում: «Բոլորին դեմ եմ»-ի ընտրողը պետք է հստակ պատկերացնի, որ իրեն չեն խաբելու, իր ձայնը ինչ-որ քաղաքական առևտուրների չի զոհաբերվելու, մենք գնալու ենք մեր երազանքի հետևից»:
Նա ասաց, որ շատ ուրախ է, որ նախորդ տարիների համեմատ` ընտրողների ակտիվությունը շատ մեծ է: Նինա Կարապետյանցը կոչ արեց բոլորին գնալ ընտրության՝ ընդգծելով, որ յուրաքանչյուրի ձայնը բացառիկ կարևորություն ունի:
Գոհար ՀԱԿՈԲՅԱՆ
