«Որպես կանանց համար ոչ ֆորմալ կրթություն կազմակերպող կազմակերպության հիմնադիր և նախկին նախագահ՝ ոչ միայն դեմ չեմ, որ կանայք ՀՀ-ում բարձր պաշտոններ զբաղեցնեն։ Որպես մեծ բիզնեսից եկած մարդ՝ կողմ եմ, որ մարդիկ անկախ իրենց սեռական պատկանելությունից՝ մասնագիտական աճ գրանցեն բացառապես իրենց մասնագիտական որակների շնորհիվ, այլ ոչ թե հին ու բարի ԽԾԲ (խնամի-ծանոթ-բարեկամ.-խմբ.) սխեմայի։ Այս սխեման հակասում է նաև ձեր ուժի որդեգրած սկզբունքներին և խոսույթին։ Հենց նման արատավոր երևույթների դեմ պայքարելով՝ ձեր ուժն եկավ իշխանության։ Ասածս վերաբերելու է ոչ թե անձին, այլ 100 տոկոս պետական մասնակցությամբ ընկերության տնօրենին։ Դիցուք՝ նա լավ մասնագետ է, իսկ որտե՞ղ է լավ վարձատրվող լավ մասնագետի արդյունքը»,- ԱԺ նիստի ժամանակ հայտարարեց «Ուժեղ Հայաստան» խմբակցության պատգամավոր Լիանա Մանուկյանը։
Նա, անդրադառնալով ՀՀ ազգային հերոս Էդուարդո Էռնեկյանի հետ «Հայփոստի» կառավարման կոնցեսիոն պայմանագիրը չերկարաձգելու փաստին՝ ասաց․ «Եթե Էդուարդո Էռնեկյանն է որոշել դադարեցնել պայմանագիրը, ուրեմն կարելի է հասկանալ՝ ինչ գործընկեր է ՀՀ-ն, որ ՀՀ ազգային հերոսը չի ցանկացել այլևս ներդրումներ անել ՀՀ-ում։ Եթե պայմանագիրը չերկարաձգելու որոշումը ՀՀ կառավարությանն է, այս դեպքում ամեն ինչ պարզ է։ Ոչ մեկի համար նորություն չէ, թե ՀՀ-ն չակերտավոր ինչպիսի «պայմաններ» է ստեղծում խոշոր ներդրողների համար»։
Լիանա Մանուկյանը նշեց՝ կոնցեսիոն կառավարման տարիներին՝ 2006-2020-ին, չնայած ընկերությունը իրականացնում էր խոշոր ներդրումային ծրագրեր, սակայն այդ տարիների՝ նրա հաշվեկշռում կարող ենք արձանագրել կամ փոքրիկ շահույթ կամ կառավարելի վնաս․ «Պետական կառավարման անցնելուց հետո կտրուկ վատթարացել են «Հայփոստի» ֆինանսական ցուցանիշները։ 2020-ի ֆինանսական հաշվետվություններում մենք կտեսնենք, որ 2019-ի համեմատ կուտակված վնասն աճել է 163 տոկոսով, այնինչ սակագինը ամենատարածված երկու ծառայությունների դեպքում մի դեպքում 88 տոկոսով, մյուս դեպքում 124 տոկոսով աճել է։ Այս տարիների ընթացքում թոփ մենեջմենթի գծով ծախսն աճել է 28,6 տոկոսով։ Մասնավոր ընկերությունում, երբ ընկերությունը վնասով է աշխատում, առաջին հերթին կրճատվում են թոփ մենեջմենտի պարգևավճարները և աշխատավարձերը։ Եթե «Հայփոստի»՝ այս տնօրենի պաշտոնավարման ժամանակ ընկերության արձանագրած արդյունքներն այսպիսին են, ապա ուզում եմ տալ հարցը՝ որտե՞ղ է լավ վարձատրվող լավ մասնագետի արդյունքը։ Իսկ եթե չկա արդյունք, և մարդը շարունակում է պաշտոնավարել, ուրեմն կարող ենք ենթադրել, որ այստեղ կա հովանավորչություն»։
Կարդացեք նաև
ԱԺ նիստն ամբողջությամբ՝ տեսանյութում
Տաթև ՀԱՐՈՒԹՅՈՒՆՅԱՆ
Լուսանկարում՝ ՔՊ խմբակցության պատգամավոր Հայկ Կոնջորյանը եւ նրա կինը՝ «Հայփոստի» տնօրեն Շուշան Ալեքսանյանը։
