Նորընտիր խորհրդարանն իր երկրորդ եռօրյայի նիստերն է գումարում, ուստի մեր պատգամավորների նախասիրությունների, աշխատաոճի մասին կարելի է արդեն որոշ դիտողություններ կատարել։
Մամուլի հանդեպ վերաբերմունքը մեր օրերում բնութագրիչ նշանակություն ունի, հատկապես եթե նկատի ունենանք ձեւավորվող այն տեսակետը, ըստ որի՝ հայ հասարակությունն աստիճանաբար խորթանում է զանգվածային լրատվության միջոցներից։
Այս առումով հետաքրքիր է իմանալ, թե օրենսդիր այրերը.
ա) հետեւո՞ւմ են արդյոք մամուլին,
Կարդացեք նաև
բ) ի՞նչ մամուլ են նախընտրում՝ տեղական թե արտերկրի եւ
գ) մամուլի հատկապես ո՞ր միջոցներն են հարաբերականորեն լայն ժողովրդականություն վայելում։
Ըստ այդմ՝ առաջին հարցն արժանանում է միանշանակ դրական պատասխանի, ժամը 10-ից մինչեւ մեծ ընդմիջում գրեթե բոլոր պատգամավորների ձեռքերին, նստարաններին կարելի է տեսնել թերթերի տրցակներ։ Այդ տրցակներից ակնհայտ է դառնում, որ տեղական մամուլը բացահայտ գերակշռություն ունի ռուսաստանյանի համեմատ։
Պարտադիր համարվող հասարակական-քաղաքական ուղղվածության թերթերին՝ «Ազգ», «Լրագիր», «Հանրապետություն», զուգահեռ՝ առաջնություն է վայելում «Կին եւ տղամարդը», որի ընթերցումը նստաշրջանի ժամանակ կրում է զանգվածային, հետեւողական եւ անգամ խմբային մտքի փոխանակումներով ուղեկցվող բնույթ։
Նարինե ԴԻԼԲԱՐՅԱՆ
