«Այս տարի մայրաքաղաքում ջրամատակարարման տեւողությունը հասել է միջինը 21 ժամի: Այս ցուցանիշը բարելավվելու է՝ ընդհուպ մինչեւ օրը 24 ժամը»,- երեկ լրագրողների հետ հանդիպման ժամանակ վստահեցրեց «Երեւան ջուր» ընկերության արտաքին կապերի եւ հաղորդակցության տնօրեն Ռոբերտ Նազարյանը: Նրա ներկայացմամբ՝ Երեւանում նախատեսում են կառուցել 150 բակային պոմպակայան, որոնք հնարավորություն կտան ավելացնել բարձրահարկ շենքերում ջրամատակարարման ժամերը եւ զգալիորեն խնայել դրա համար անհրաժեշտ էլեկտրաէներգիան: Նախատեսվում է նաեւ կառուցել 2 նոր ջրագիծ եւ վերակառուցել կարգավորիչ 4 ջրամբար: Ռոբերտ Նազարյանի խոսքերով, ոլորտում առկա խնդիրներից է ջրի կորուստը, որը աղբյուրից մինչեւ ծորակ կազմում է 84%: Սակայն, ըստ բանախոսի, ջրագծերի փոփոխման արդյունքում ջրի կորուստները աստիճանաբար կկրճատվեն:
Նշենք, որ եկող ամիս Հանրային ծառայությունները կարգավորող հանձնաժողովը Երեւան քաղաքում ջրի սակագնի վերաբերյալ պետք է որոշում կայացնի: Հիշեցնենք, որ «Երեւան ջուր» ընկերության կողմից հանձնաժողովին է ներկայացվել խմելու ջրի 1 խմ-ի դիմաց՝ 189.9 դրամ սակագինը:
