Նախօրեին ՀՀ ոստիկանությունը մի հետաքրքիր տեղեկատվություն էր տարածել, ըստ որի՝ ապրիլի 27-ին, ժամը 13.30 սահմաններում Երեւանի Ծարավ աղբյուրի փողոցում անհայտ անձինք զինված ավազակային հարձակում են գործել ոստիկանության զորքերի աշխատավարձը տեղափոխող «ԳԱԶ-24» մակնիշի ավտոմեքենայի վրա, սակայն հանդիպելով ոստիկանության զորքերի ծառայողների դիմադրությանը, դիմել էին փախուստի: Երեկվա դրությամբ հանցագործները դեռ չէին հայտնաբերվել: Ոչ պաշտոնական տվյալներով, մեքենայով տեղափոխվող գումարը կազմել է մոտ 93 միլիոն դրամ:
Այս տեղեկությունը նախ ուշագրավ էր այն առումով, որ այդքան մեծ գումարը տեղափոխվել է ոչ թե ինկասացիայի զրահապատ մեքենայով, այլ՝ սովորական «ԳԱԶ-24» ավտոմեքենայով: Գուցե ոստիկանությունը օպերատիվ տեղեկություն էր ստացել, որ այդ օրը ավազակային հարձակում է լինելու իրենց աշխատավարձը տեղափոխող ինկասացիայի վրա եւ «ԳԱԶ-24»-ով տեղափոխելը պարզապես քողարկելու տարբերակ է եղել: Իսկ եթե ոչ՝ հարց է առաջանում, թե ինչո՞ւ է բարձր տեխնոլոգիաների այս դարում, հատկապես ոստիկանության համակարգի համար նախատեսված աշխատավարձը, միանգամից աշխատակիցների քարտային հաշվին փոխանցվելու փոխարեն, շրջել Ծարավ աղբյուրի փողոցում:
Այս առնչությամբ երեկ «Առավոտի» հարցին ի պատասխան՝ ոստիկանության լրատվական ծառայությունից միայն հայտնեցին, որ գումարի տեղափոխման հանգամանքները պարզելու համար ՀՀ ոստիկանապետի հանձնարարությամբ ծառայողական քննություն է նշանակվել:
