Aravot.am-ի հարցին` արդյոք երեկ «Ազատություն» ռադիոկայանի եթերում ՀՀ նախկին արտգործնախարար, ԲՀԿ համամասնական ցուցակի երկրորդ հորիզոնականը զբաղեցնող Վարդան Օսկանյանն արտահայտել է ԲՀԿ-ի պաշտոնական տեսակե՞տը, Գագիկ Ծառուկյանի մամուլի խոսնակ Խաչիկ Գալստյանը պատասխանեց. «Ոչ, բնականաբար: Պարոն Օսկանյանն արտահայտել է իր անհատական կարծիքը»:
Հիշեցնենք, որ Վարդան Օսկանյանն ասել էր. «Նախորդ չորս տարիներին իշխող քաղաքական կոալիցիան ձեւական է եղել, եւ Հանրապետականն էլ արել է այն ինչ ցանկացել է, ուստի երկրում առկա սոցիալ–տնտեսական ծանր վիճակի պատասխանատվությունն ամբողջությամբ Հանրապետականի վրա»:
Դիտարկմանը` այսինքն, ԲՀԿ-ն չի՞ փորձում խուսափել պատասխանատվությունից, Խաչիկ Գալստյանն արձագանքեց. «Բարգավաճ Հայաստանը» միշտ էլ հայտարարել է, որ պատասխանատու է այն չափով, ինչ չափով որ կառավարությունում տեղ ունի»:
Մամուլի ակումբներից մեկում էլ երիտասարդ ԲՀԿ-ական Վահան Բաբայանն այսօր կարծիք էր հայտնել, որ կոալիցիան, ըստ էության, այլեւս գոյություն չունի: Սա նույնպես մեր զրուցակիցը որակում է անձնական կարծիք հիշեցնելով, որ պաշտոնական տեսակետ արտահայտելու իրավասություն ունեն կուսակցության նախագահը եւ նրա կողմից լիազորված անձինք` մամուլի խոսնակը կամ այլ պատասխանատուներ: Ըստ Խաչիկ Գալստյանի` «Կոալիցիան գործում է մինչեւ ընտրություններ»:
Կարդացեք նաև
Նելլի ԳՐԻԳՈՐՅԱՆ
