Այսօր Aravot.am-ը ՀՅԴ խմբակցության ղեկավար Վահան Հովհաննիսյանից հետաքրքրվեց, թե ինչո՞ւ են ընդդիմությունը պառակտում եւ համակարգված չեն աշխատում` մեծամասնական ընտրակարգով ավելի շատ մանդատ վերցնելու համար: Խոսքը մասնավորապես թիվ 4 ընտրատարածքում անկուսակցական Սաթիկ Սեյրանյանին պաշտպանելու մասին է: Այդ նույն ընտրատարածքում առանց այդ էլ ՀԱԿ-ն ու «Ժառանգությունն» առաջադրել են տարբեր թեկնածուների` Արամ Մանուկյանին ու Զարուհի Փոստանջյանին: Այս առնչությամբ Վահան Հովհաննիսյանը պատասխանեց. «Ի՞նչ պառակտելու մասին է խոսքը, ո՞ւմ համար են աշխատում կուսակցական թեկնածուները, ի՞մ: Պարզ է, որ իրենց համամասնական ցուցակների համար են աշխատում, իսկ ես ինչո՞ւ պիտի պաշտպանեմ նրանց: Մենք միասնական համամասնական ցուցակով հանդես չենք գալիս: Նույնիսկ կոալիցիան է ընտրությունների գնում առանձին-առանձին, մենք ինչո՞ւ պիտի մտածեինք ընդդիմության հետ միասին աշխատելու մասին»: Մեր հարցին` այսինքն խնդիր չունե՞ք ՀՀԿ-ին թույլ չտալ մեծամասնական ընտրակարգի հաշվին մանդատ ավելացնելու` պարոն Հովհաննիսյանը պատասխանեց. «Մեր խնդիրը հետեւյալն է` եթե ոչ դաշնակցությունը, ապա ում էլ ընտրեք` նույն վիճակն է լինելու, ոչինչ չի փոխվելու»:
Հռիփսիմե ՋԵԲԵՋՅԱՆ
