Երեւանի ավագանու ընտրությունների ՀՅԴ ցուցակի 2-րդ հորիզոնականը զբաղեցնող Աղվան Վարդանյանը առավոտյան Դավիթաշենում գտնվող 5/18 տեղամասում քվեարկություն կատարեց: Ընտրատեղամասում պարոն Վարդանյանը կարճ զրույցի էր բռնվում մարդկանց հետ՝ «Բարեւ, ո՞նց ես, ամեն ինչ լա՞վ է», եւ ինչպես ավագանու թեկնածուն ասաց՝ դե այս թաղամասում եմ ապրում, ծանոթներ շատ կան: Արդեն քվեարկությունը կատարած, մնում էր միայն քվեաթերթիկը քվեատուփը գցել, մեկ էլ հանձնաժողովի գեղեցկադեմ աղջիկը, որի հետ պարոն Վարդանյանը կրկին մի քանի վայրկյանանոց զրույցի էր բռնվել, նկատեց, որ ընտրող Աղվան Վարդանյանի քվեաթերթիկն առանց ծրարի է:
Մանրամասները՝ տեսանյութում
Aravot.am-ի հարցին, թե ինչպե՞ս է գնահատում ՀՅԴ-ի շանսերն այս ընտրություններում, հաշվի առնելով այն հանգամանքը, որ մայիսի 3-ից իրենց գրասենյակը ընտրակաշառքների մասին ահազանգեր է ստանում, պարոն Վարդանյանն ասաց. «Երեկ ամբողջ գիշեր ահազանգեր են եղել, որոնք շատ-շատ էին, մենք բոլոր ահազանգերը փոխանցում էինք ոստիկանությանը, հույս ունենք համապատասխան արձագանք կլինի: Ես կարծում եմ՝ մեր քաղաքացիները շատ լավ տարբերում են թացը չորից, եւ Երեւանում գոնե պիտի ընտրակաշառքները նման ազդեցություն չունենան: Պետական համակարգի աշխատողների կախվածությունն ավելի մեծ է. գունավոր գրիչներ, հատուկ ծալելու ձեւեր եւ այլն: Սրանք են վտանգավոր, բայց ես կարծում եմ՝ մեր քաղաքացիներն արդեն ամեն ինչ տեսել են եւ այս անգամ ճիշտ կկողմնորոշվեն»:
Լրագրողների հարցին, թե ինչ ակնկալիքով է ընտրություն կատարել, պարոն Վարդանյանն ասաց. «Եկել եմ փոփոխության համար, փոփոխություններ մեր քաղաքում` Երեւանում, Հայաստանում, եւ եկել եմ, որ մեր քաղաքացիները ինքնուրույն եւ ազատ լինեն, իրենց քվեի տերը լինեն»:
Կարդացեք նաև
Նելլի ԲԱԲԱՅԱՆ
