Նախկին ՀՀՇ վարչության անդամ Երջանիկ Աբգարյանը Գագիկ Ծառուկյանին համեմատում է Արթուր Բաղդասարյանի հետ:
– Հայ ազգային կոնգրեսից տարաձայնությունների պատճառով հեռացած նախկին ՀՀՇ ներկայացուցիչներ Արարատ Զուրաբյանը, Ալեքսանդր Արզումանյանը, Հովհաննես Իգիթյանն ու Կարապետ Ռուբինյանը նախաձեռնել են ՀՀՇ-ի վերագրանցման գործընթացը: Հավանակա՞ն է, որ Դուք էլ միանաք նրանց:
– Ես իմ կուսակցական գործունեությունն ավարտված եմ համարել ՀՀՇ-ի ինքնալուծարումից հետո, եւ դա, տարիքս հաշվի առնելով, վերջնական որոշում է: Ես այդ նախաձեռնությանը դրական եմ վերաբերվում եւ կարծում եմ, որ նրանք իրենց գլխավոր հարցը կհամարեն Հայաստանի ապագան եւ զուսպ կլինեն ընդդիմության միջկուսակցական հարաբերություններում:
– Ինչպե՞ս կգնահատեք առաջին նախագահի այն հայտարարությունը, որ ՀՀՇ-ն վերածվել էր «գեղի կլուբի» եւ «ծերակույտի»: Ընդհանրապես, ՀՀՇ-ի վերանվանումը ՀԱԿ-ի Ձեր կարծիքով՝ ի՞նչ հարց լուծեց կամ դեռ պետք է լուծի:
Կարդացեք նաև
– Դուք սխալվում եք, ՀԱԿ-ը միանգամայն նոր կուսակցություն է, որի մեջ նախկին հհշականների հետ միավորվել են մեծ թվով անկուսակցականներ, հայտնի դեմքեր, հայտնվել են ռազմավարական եւ մարտավարական նոր երանգներ ՀԱԿ կուսակցության գործունեության մեջ:
Ինչ վերաբերում է ՀՀՇ-ի մասին ՀՀ առաջին նախագահի ձեր նշած արտահայտություններին, ես կարծում եմ, որ դրանք կամ որոշ ՀՀՇ-ականների գործունեության հետ էին կապված, կամ ենթադրելի է՝ ՀՀՇ գործունեության որոշակի ժամանակահատվածի:
– «Մեր կուսակցության ստեղծման հիմնական պատճառներից մեկն այն է, որ Հայաստանում բռնապետական ռեժիմ է, որի դեմ մենք պայքարել ենք տարիներ շարունակ եւ շարունակելու ենք մեր պայքարը սահմանադրական կարգի վերականգնման համար»՝ ասել է Արարատ Զուրաբյանը: Կարծում եք՝ կհաջողե՞ն:
– Դա քաղաքական եւ քաղաքացիական ճիշտ դիրքորոշում է եւ ներկա Հայաստանում որեւէ քաղաքական ուժի ստեղծման ամենահիմնական պատճառը: Մնացածները ինքնըստինքյան հեշտությամբ կվերացվեն այդ հարցի լուծումով: Իսկ թե «կհաջողե՞ն» այդ գործում՝ ես հաջողություն եմ մաղթում բոլոր նրանց, ովքեր պայքարում են այս անօրինական եւ դավաճանական իշխանության դեմ:
– Ի՞նչ մրցակցություն է գնալու նորաստեղծ ՀԱԿ-ի եւ նոր ստեղծվելիք ՀՀՇ-ի միջեւ:
– Մրցակցության հարց չեմ տեսնում: Կուզեի տեսնել փոխադարձ հանդուրժողականություն եւ համագործակցություն միեւնույն նպատակի իրականացման գործում:
– Երեկ ԲՀԿ առաջնորդ Գագիկ Ծառուկյանը հայտարարեց, որ ԲՀԿ-ն չի կարող ընդդիմություն լինել: Դա հայաստանյան քաղաքական կյանքում ի՞նչ ազդեցություններ եւ դրսեւորումներ կունենա:
– Դա ինձ համար ակնհայտ էր հենց սկզբից: Ծառուկյանն իր սեւ «գործը» կատարեց՝ ժողովրդին «այլընտրանք» ներկայանալով: Այժմ եկել է ժամանակը դափնու «կանաչ» տերեւները քաղելու, ինչո՞վ է պակաս Արթուր Բաղդասարյանից: 1998-ի նախագահական ընտրություններից սկսած՝ արտառոց իրավիճակ է Հայաստանում՝ յուրաքանչյուր նախագահական ընտրություն բացահայտում է ժողովրդի շահերը իր անձի շահերին ծառայեցնող հռչակավոր մի կոմբինատոր եւ էլ ավելի է ամրապնդում քրեաօլիգարխիկ ներկա համակարգը:
– Կարելի՞ է ասել, որ Տեր-Պետրոսյանի քաղաքագիտական վերլուծությունը՝ ԲՀԿ-ին ընդդիմադիր դաշտ մղելուն ուղղված, տապալվեց:
– Ես չգիտեմ, ես այս հարցի վերաբերյալ Լեւոն Տեր-Պետրոսյանի ունեցած ինֆորմացիաներից տեղյակ չեմ, հետեւաբար ձեռնպահ եմ մնում որեւէ գնահատականից:
– Ինչո՞ւ Ծառուկյանի հայտարարությունը հնչեց հիմա եւ ոչ թե նախագահական կամ Երեւանի ավագանու ընտրություններից առաջ: Ի՞նչ կտար դա:
– Կարծում եմ՝ Ծառուկյանի այս մեկամյա աճպարարությունը ընդգրկում էր համապետական եւ Երեւանի ավագանու ընտրությունների մի ցիկլ, որն ավարտվեց մայիսի 5-ին: Տվածը ակնհայտ էր՝ բոլոր ընտրություններում, որտեղ որոշվում էին իշխանությունն անպայման պահելու խնդիրները, իշխանությունները կեղծարարությամբ շռնդալից «հաղթանակներ» տարան:
Զրույցը՝ ՆԵԼԼԻ ԳՐԻԳՈՐՅԱՆԻ
