«Մենք միշտ կողմնակից ենք եղել, որ համագործակցենք տարբեր քաղաքական ուժերի հետ: Հիմա էլ ենք ցանկանում, բայց իրենք չեն ցանկանում: Բայց այնպես չի, որ մենք այդպես շատ վատ եւ բարդ վիճակի մեջ ենք հայտնվել եւ մենակ ենք մնացել»,- ապրիլի 17-ին Aravot.am-ի հետ զրույցում ՀՀԿ պատգամավոր Սուքիաս Ավետիսյանն այսպես պատասխանեց մեր հարցին՝ ՕԵԿ-ի հետ քաղաքական ապահարզանից եւ ՀՅԴ-ի՝ կառավարության մաս չկազմելու հայտարարությունից հետո ՀՀԿ-ն բա՞րդ իրավիճակում է հայտնվել՝ մնալով մենակ:
Մենք հետաքրքրվեցինք՝ անակնկա՞լ էր Ձեզ համար ՕԵԿ-ի հայտարարությունը: Սուքիաս Ավետիսյանը պատասխանեց. «Ինձ համար ոչ թե անակնկալ էր, ինձ համար զարմանալի էր, անհասկանալի էր, որովհետեւ նորմալ գործընթաց է եղել կոալիցիոն շրջանակներում եւ լրիվ ինձ համար զարմանալի հայտարարություն էր»:
Մեր հարցին՝ Հեղինե Բիշարյանն ասել էր, որ իրենք ընդդիմության շարքերն են համալրելու, որ սկսեն արդեն քննադատել ՀՀԿ-ին ու Սերժ Սարգսյանին, դա դավաճանություն չի՞ լինի՝ Սուքիաս Ավետիսյանը պատասխանեց. «Դա արդեն թող իրենք որոշեն ընդդիմության հետ ինչ են անելու: Թող ի վերջո կողմնորոշվեն, թե ով է վերջնական ընդդիմությունը»:
Սուքիաս Ավետիսյանը հաստատեց, որ Արթուր Բաղդասարյանը եւ Սերժ Սարգսյանը անձնական շատ ջերմ հարաբերություններ են ունեցել, ուստի այդ առումով էլ իր համար խիստ անհասկանալի է եղել Արթուր Բաղդասարյանի այդ քայլը:
Կարդացեք նաև
Մենք նաեւ ճշտեցինք՝ այն, որ ՀՅԴ-ն որոշում կայացրեց կառավարությանը մաս չկազմել, փաստորեն պորտֆելների հարցով ՀՀԿ-ի հետ չե՞ն կարողացել համաձայնության գալ՝ Սուքիաս Ավետիսյանը պատասխանեց. «Կարող է կառավարությանը մաս չկազմեն, բայց համագործակցեն ինչ-որ հարցերում, այսօր դա չի կարելի միանշանակ ընդունել, էլի: Չեն ուզում գործադիր մարմնում լինեն, բայց համագործակցության համար մեծ դաշտ կա»:
Ինչ վերաբերում է նախկին ՕԵԿ-ական նախարարների մնալուն՝ Սուքիաս Ավետիսյանն ասաց, որ դրա մասին կարելի է խոսել այն ժամանակ, երբ նոր կառավարություն կկազմավորվի:
Հռիփսիմե ՋԵԲԵՋՅԱՆ
