Ստեփանավանի օդանավակայանի շինարարությունը մինչեւ տարեվերջ կավարտվի: Այսօր խորհրդարանում, հանձնաժողովների համատեղ նիստում, 2013 թվականի բյուջեի կատարողականի քննարկման ժամանակ ասաց արտակարգ իրավիճակների նախարարի տեղակալ Հայկարամ Մխիթարյանը`պատասխանելով պատգամավոր Թեւան Պողոսյանի հարցին:
Հիշեցնենք,որ Ստեփանավանի օդանավակայանը գտնվում է ԱԻՆ-ի հաշվեկշռում:
Պատգամավորը հետաքրքրվել էր`ի՞նչ վիճակում է այն եւ ե՞րբ է սկսվելու օդանավակայանի շահագործումը: Նախարարի տեղակալն ասաց, որ օդանավակայանի շինարարության համար անհրաժեշտ գումարը տրված է. «Ովքեր այնտեղ եղել են, գիտեն, օդանավակայան հասկացողությունը չկար: Շենքի շինարարության աշխատանքներն են սկսվել եւ առաջիկա ամիսներին կավարտվեն, ցանկապատման աշխատանքներն ավարտվել են, պալասաները վերանորոգվում են: Մինչեւ տարեվերջ կավարտենք եւ կանցնենք Ղափանի օդանավակայանին, որը մեզ չի տրվել, սպասարկումն ենք իրականացնելու»:
Հայկարամ Մխիթարյանն ասաց, որ այդպիսով Հայաստանում փոքր ավիացիայի զարգացման հիմք կդրվի:
Կարդացեք նաև
Նախորդ տարվա բյուջեի կատարողականը ներկայացնելիս, նախարարի տեղակալը խոսել էր նաեւ համակարգում առկա թափուր աշխատատեղերի մասին: Թեւան Պողոսյանի հաջորդ հարցը դրան էր վերաբերվում: Արդյոք թափուր աշխատատեղերի պատճառը արտագա՞ղթն է` հարցրեց պատգամավորը: Հայկարամ Մխիթարյանը հաստատեց, որ համակարգում թափուր աշխատատեղեր կան`բայց ստույգ թիվը, թե ո՞ր ծառայությունում որքան, ասաց`չի կարող նշել: Բայց խնդիրը չկապեց արտագաղթի հետ. «Պրոցես է»:
Նելլի ԳՐԻԳՈՐՅԱՆ
