Հունիսի 1-ին Երեւանի փոխոստիկանապետ Վալերի Օսիպյանի եղբորորդու մասնակցությամբ տեղի ունեցած վիճաբանության վկա Սարգիս Հովհաննիսյանի մայրը շարունակում է պնդել Օսիպյանի առաջարկության մասին:
Սարգիսի մայրը՝ Սուսաննա Հովհաննիսյանը, պնդում է, որ Վալերի Օսիպյանն իրեն առաջարկել է համագործակցել, համոզել որդուն, որ դանակահարությունն իր վրա վերցնի. «Տիկին Սուսաննա ձեր տղան՝ Սաքոն, թող վերցնի իր վրա, ես կօգնեմ, նա իմ եղբորորդին է, իմ ազգականն է, նրան չեմ կարող նրան օգնել»:
Տիկին Հովհաննիսյանի պատմելով, իր հարեւանուհին՝ Գոհար Կարապետյանը նույնպես ներկա էր, երբ Վալերի Օսիպյանն իրեն նման բան առաջարկեց ու հետո այդ մասին նրա հարեւանուհին պատմել է փոխոստիկանապետի եղբորը. «Գոհարն ասում է՝ եղբայրդ իմ ներկայությամբ Սուսաննային նման բան առաջարկեց, ասում է՝ եղբայրս կուտ է տվել, ես էլ եմ աշխատել էդ համակարգում, էդ մեր կուտ տալու ձեւերն են»:
Նա Aravot.am-ին նաեւ պատմեց, որ հունիսի 2-ին էլ Վալերի Օսիպյանը իր պաշտոնական լիազորությունները չարաշահելով, իր ավագ որդուն է ոստիկանության կենտրոնի բաժին հրավիրել եւ իր մորաքրոջ տղայի հետ, որը նախկին ոստիկան է, ուղարկել վիճաբանությունից տուժող Վանուշ Ալեքսանյանի մոտ՝ հիվանդանոց՝ համոզվելու, որ իրեն Սեդրակն է դանակահարողը եղել. «Խանութում էի, երբ Վալերի Օսիպյանը զանգեց, իմ հեռախոսահամարն էր ուզում, վաճառողուհին էլ ասաց՝ Սուսանն էստեղ է ու փոխանցեց հեռախոսն ինձ: Օսիպյանը պահանջեց ավագ որդուս հեռախոսահամարը, տվեցի, զանգեց ու իր մոտ կանչեց տղայիս ու ուղարկել է հիվանդանոց: Էնտեղ տուժածի բոլոր հարազատներն էլ ասել են՝ ձեր Սեթոն է դանակահարողը եղել»: Նա ասաց, որ որդին Օսիպյանի հետ հանդիպման մանրամասներն իրեն չի պատմել:
Կարդացեք նաև
Տիկին Հովհաննիսյանը պնդում է ՝ ինքը մինչեւ վերջ բողոքելու է եւ արդարությունը վերհանելու է. «Եթե տուժող տղայի ծնողները չբողոքեն, ես իմ տան պատվի համար եմ բողոքելու: Մինչեւ վերջ գնալու եմ: Իմ տղան ընդամենը եղել է միջնորդ, որը բաժանել է վիճաբանությունը: Թող չփորձեն իրենց եղբորորդու արածը բարդեն իմ երեխայի վրա»:
Արփինե ՍԻՄՈՆՅԱՆ
Մանրամասները շուտով` տեսանյութում
