Այսօր՝ հունիսի 17-ին, Ոստիկանության կենտրոնական բաժանմունքից ազատ արձակվեց նախօրեին Աֆրիկյանների ակումբի շենքի տարածքից բերման ենթարկված քաղաքացիական ակտիվիստ, «Պահպանենք Աֆրիկյանների ակումբի շենքը» քաղաքացիական նախաձեռնության անդամ Սոնա Ասատրյանը:
Նա Aravot.am-ի հետ զրույցում նշեց, որ առավոտյան ահազանգ էր ստացել, որ Աֆրիկյանների ակումբի շենքը սկսել են քանդել եւ շտապել է դեպքի վայր. «Ճանապարհին մտածեցի, որ պաստառապատել են ֆասադը եւ այդ պաստառը պետք է պատռել, որպեսզի բոլորին հասանելի դառնա, թե ինչպե՞ս են քանդում. Դա առաջին բանն է, որ ես կարող էի անել: Եվ այդպես վերցրեցի դանակ, եկա եւ սկսեցի պատռել»:
Նա մեզ հայտնեց, որ իրեն մեղադրում էին ուրիշի ունեցվածքը վնասելու եւ սառը զենք ունենալու մեջ: Սոնա Ասատրյանը նշեց, որ ոստիկանության բաժանմունքում մանրամասն բացատրություն է գրել, որ իրենք էլ իմանան, թե ինչպե՞ս եւ ինչո՞ւ է արել, որից հետո էլ իրեն նկարել են.
«Բայց փաստաբանը եկավ եւ ասաց, որ իրավունք ունեի չնկարվել, նաեւ մատնահետքեր էին ուզում վերցնել, բայց փաստաբանը չթողեց, ասաց՝ ես դեռ կարգավիճակ չունեմ, այդ պատճառով էլ պետք չէ ինձնից մատնահետք վերցնել»:
Կարդացեք նաև
Հիշեցնենք՝ մի քանի օր առաջ Աֆրիկյանների ակումբի շենքի տարածքից բերման էին ենթարկել մեկ այլ քաղաքացիական ակտիվիստ Վիլեն Գաբրիելյանին՝ Նավակ ճոճողին: Ոստիկանության բաժանմունքում ՊՊԾ պետի ծառայության գծով տեղակալ Վարդան Գեւորգյանը նրա միջոցով սպառնալիք էր փոխանցել շինության համար պայքարող ակտիվիստներին:
Aravot.am-ը Սոնա Ասատրյանից հետաքրքրվեց, թե իրեն ոստիկանության բաժանմունքում սպառնացե՞լ են. «Ընդհանրապես, ուղղակի ասացին՝ էլ օրենք չխախտես»:
Հայաստանի Հելսինկյան կոմիտեի փաստաբան Ռոբերտ Ռեւազյանը Aravot.am-ի հետ զրույցում նշեց, որ Սոնա Ասատրյանին մեղադրանք դեռ առաջադրված չէ, եւ ոստիկանությունը տաս օրվա ընթացքում որոշում կկայացնի՝ քրեական գործ հարուցելո՞ւ են, թե՞ ոչ. «Երբ որ ես եկա, արդեն դատավարական գործունեություններն ավարտվել էին իր հետ, իմ ներկայությամբ որեւէ գործունեություն չի իրականացել»:
Ամի ՉԻՉԱԿՅԱՆ
Լուսանկարները՝ Արսեն Սարգսյանի / NEWS.am
