Թուրքիայի` Եվրամիության հարցերով նախարար եւ գլխավոր բանագնաց Վոլկան Բոզկիրն, անդրադառնալով հայ-թուրքական հարաբերություններին, հայտարարել էր, որ բոլորը պետք է ապրեն միասին` հետեւում թողնելով անցյալում կատարվածը:
Այս առնչությամբ Aravot.am-ը զրուցեց քաղաքագետ Հրանտ Մելիք-Շահնազարյանի հետ: Նա ակնհայտ է համարում, որ այդպիսով թուրքական կողմն փորձում է ամեն կերպ ձերբազատվել հայկական հարցից` որպես իր վրա քաղաքական ճնշումներ գործադրելու գործոն.
«Եվրամիությունը բավական վաղուց եւ շատ ջանասիրաբար հետեւողականորեն հետամուտ էր լինում, որպեսզի հայկական հարցը առկա լինի թուրք-եվրոպական հարաբերություններում: Եվ անընդհատ Թուրքիային հիշեցնում են իրենց հանցագործությունների մասին հայության եւ ընդհանրապես մարդկության հանդեպ` փորձելով դրանով իսկ կանխել Թուրքիայի ազդեցությունը հարակից տարածաշրջաններում եւ հատկապես` թուրք-եվրոպական հարաբերություններում»:
Նրա խոսքերով` Թուրքիայի իշխանությունները տարիներ շարունակ ամեն ինչ արել են, որ հայկական հարցը` որպես այդպիսի գործոն, ընդհանրապես չեզոքանա եւ Եվրոպայի կողմից մոռացության մատնվի: Ըստ նրա` այդ է պատճառը, որ ամեն հարմար առիթ թուրքական կողմը ցանկանում է օգտագործել իր առջեւ ծառացած այդ խնդիրը լուծելու համար.
Կարդացեք նաև
«Այս տարիների ընթացքում Թուրքիային դա չի հաջողվել, եւ չկան որեւէ հիմքեր պնդելու, որ հիմա, երբ որ Հայաստանը եւ ամբողջ քաղաքակիրթ աշխարհը պատրաստվում է Հայոց ցեղասպանության 100-րդ տարելիցին նվիրված միջոցառումներին, Թուրքիան ցանկանում է այդ փուլում ձերբազատվել` իր վրա ճնշում գործադրելու այդ գործոնից»:
Քանի դեռ հանցանքն իր պատիժը չի ստացել, եւ Թուրքիան վարում է ժխտողական քաղաքականություն հայ-թուրքական բարի դրացիական հարաբերությունները քաղաքագետն անհնար է համարում: Ըստ նրա` այդպիսի հայտարարություններով Թուրքիան պարզապես ցանկանում է ժամանակ շահել եւ ինչ-որ մի կերպ անցկացնել Հայոց ցեղասպանության 100-րդ տարելիցը: Սակայն, Թուրքիան հստակ հասկանում է, որ խուսափել Հայոց ցեղասպանության քննարկումից իրեն չի հաջողվի.
«Առաջիկա մեկ տարվա ընթացքում դա լինելու է տարածաշրջանի ամենամեծ հնչեղություն ունեցող գործընթացներից մեկը, եւ հետեւաբար` Թուրքիան այս փուլում փորձում է հնարավորինս այդ երկխոսության մեջ շեշտադրումները փոխել եւ փորձել ինչ-որ չափով խուսափել պատասխանատվությունից: Բոլորս հասկանում ենք, որ Էրդողանի ցավակցական նամակը` ուղղված ցեղասպանության զոհերի ժառանգներին, ըստ էության, ժխտողական քաղաքականության նոր մեխանիզմ է»:
Ամի ՉԻՉԱԿՅԱՆ
