«Դուրս մեր գրպանից» նախաձեռնության անդամներից 10 վարորդ սպասում է կարմիր գծանշանների հատվածում կայանման համար չվճարելու տուգանքներին:
Ինչպես արդեն տեղեկացրել էինք, նրանք այսօր բոյկոտեցին կարմիր գծանշանները ու կայանելով ավելի քան 20 րոպե այդ «ծառայության» համար չվճարեցին:
«23 րոպե է՝ մենք կանգնած ենք, արեցինք այն, ինչ խոստացել ենք: Ավելի քան 8 րոպե թույլատրված ժամանակահատվածից կանգնած ենք կարմիր գծերում, բոլորդ համոզվեցիք, որ ոչ մի տեսախցիկ այստեղ չի նկարում, ոչ մի շրջիկ մեքենա չի շրջում, վճարման մասին նախազգուշացնող ոչ մի ցուցանակ չկար: Հարգելի քաղաքացիներ, կանգնեք կարմիր գծերի մեջ եւ վստահ եղեք, որ ոչ ոք իրավունք չունի ձեզ պարտադրել վճարելու այդ տարածքներում կանգնելու համար»,- ասաց նախաձեռնության անդամ Վարդան Հակոբյանը:
Կարդացեք նաև
Նա հիմնավորեց նաեւ իր հորդորը, թե ինչու է պնդում, որ կարմիր գծերի հատվածում կայանելու համար չվճարողներին ոչ ոք չի կարող պարտադրել, որովհետեւ. «Այն տարածքները, որոնք գծանշված են կարմիր գծանշաններով չեն համապատասխանում կառավարության 2010 թվականի բնութագրմանը, թե ինչ է նշանակում կայանատեղի: Այն տեղերը, որոնք գծանշել են, երթեւեկության հատվածներ են, կայանատեղեր չեն: Դրանք չունեն կառավարության սահմանած համապատասխան բնութագիրը, այսինքն` չունեն ապահով ելք ու մուտք»:
Հետո էլ ասաց, որ կարմիր գծերի համար գանձվող գումարները հարկատեսակների մեջ չեն մտնում, բայց տուրք էլ չէ, որովհետեւ. «Տուրքը կատարվում է որոշակի ծառայության դիմաց: Իսկ սա ծառայություն չէ: Ահա թե ինչու չպետք է վճարել կարմիր գծանշաններով կայանատեղերի համար»:
Նա նաեւ ասաց, որ իրենց հաջորդ երթը նախատեսել են սեպտեմբերի 26-ին, այս անգամ բողոքելու են ԴԱՀԿ-ի գործառույթներից:
Հիշեցնենք, որ տուգանքները չվճարած վարորդների հաշիվները ԴԱՀԿ-ի կողմից սառեցվում են: Իսկ հոկտեմբերի 3-ին կրկին ավտոերթ, այս անգամ, ըստ պարոն Հակոբյանի. «Անհնազանդության ավտոերթ է լինելու: Ծամոնի նման այսպես անվերջ ձգել չենք կարող: Ակնկալում ենք կոնկրետ որոշումներ:
Արփինե ՍԻՄՈՆՅԱՆ
