«Սերժ Սարգսյանն ասում է, որ կառավարման ձեւի հետ կապված իր համար գործող կառավարման մոդելն առավել ընդունելի է: Լավ, հիմա չեմ հասկանում, էլ ինչի՞ համար եք Սահմանադրությունը փոխում: ԲՀԿ-ն ու «Ժառանգությունը» չեն ուզում հիմա դա լինի, մենք չենք ցանկանում, Դաշնակցությունը ցանկանում է: 131 պատգամավորից 5 հոգին ցանկանում է: Բայց իմ խորին համոզմամբ՝ դա հիմք չի կարող լինել, որ միայն Դաշնակցության համար զոռով Սահմանադրությունն ընդունեն»,- ՀԱԿ խմբակցության ղեկավար Լեւոն Զուրաբյանը երեկ «Սահմանադրական բարեփոխումներ. թեր եւ դեմ» թեմայով խորհրդաժողովի ժամանակ այսպիսի կարծիք հայտնեց:
ՀՅԴ խմբակցության քարտուղար Աղվան Վարդանյանն Aravot.am-ի հետ զրույցում, ի պատասխան Լեւոն Զուրաբյանի այդ դիտարկմանը՝ ասաց. «Ես չգիտեմ պարոն Զուրաբյանն ում անունից էր խոսում: Մի բան կարող եմ վկայել, որ Ազգային ժողովում կա ՀԱԿ խմբակցություն 7 անձից կազմված, հրապարակված, բայց իրական թիվը չգիտենք 2 է, թե՞ 3: Ու 2-3 հոգով խոսել 131 պատգամավորի անունից, կարծում եմ, ճիշտ չէ»:
Հռիփսիմե ՋԵԲԵՋՅԱՆ
