Այսօր Արաբկիր եւ Քանաքեռ-Զեյթուն վարչական շրջանների ընդհանուր իրավասության դատարանում Բուդաղյանների փաստաբան Հայկ Ալումյանը դատարանին ներկայացրեց քրեական գործով տուժող Ավետիք Բուդաղյանի իրավահաջորդ Էմիլ Բուդաղյանի բողոքը:
Հայկ Ալումյանը նախ դատավոր Արթուր Մկրտչյանին ներկայացրեց քննիչի վարկածը եւ իր հակափաստարկները. «Ըստ քննիչի, տեսնելով, որ Արտակ եւ Ավետիք Բուդաղյանները փորձում են իրականացնել իրենց կողմից հնչեցված սպառնալիքները, Զարզանդ Նիկողոսյանը կրակել է մի քանի անգամ եւ թաքնվել բետոնե հենասյան հետեւում: Գործում առկա ցուցմունքներից քննիչն իր որոշման մեջ Սուրիկ Խաչատրյանի մասով հիշատակել է միայն Էմիլ Բուդաղյանի ցուցմունքի մի հատվածը: Դատախազը հրաժարվել է ներկայացնել ինձ եւ վստահորդին քրեական գործի փաստաթղթերը՝ պատճառաբանելով, թե քրգործը դեռեւս գտնվում է նախաքննության փուլում: Քրգործի մեջ շատ այլ նյութեր էլ կան, որոնց վրա կարելի էր հիմնվել, բողոքը կլիներ այն ժամանակ անհամեմատ ավելի պատճառաբանված, բայց ես դրան ծանոթ չեմ եղել, քանի որ նյութերն ինձ չեն տրամադրել»:
Հայկ Ալումյանը հայտարարեց, որ քննիչի եւ զինդատախազի որոշումներն ակնհայտ անհիմն են եւ ակնհայտ անօրինական. «Գործի նյութերը չտրամադրելը զրկել է ինձ եւ վստահորդին քննիչի որոշման բողոքարկման արդյունավետությունից: Մեզ անհրաժեշտ էին ցուցմունքներն ամբողջությամբ ոչ թե միայն այն հատվածները, որոնք կային քննիչի որոշման մեջ: Եթե կողմը զրկված էր դրանք ձեռք բերելու իրավունքից, այդ եզրակացության հիմնավորումներն են պետք: Նույնիսկ այն սակավաթիվ ապացույցները, որոնք մինչ բողոքը ներկայացնելը տրամադրված են ինձ եւ վստահորդիս, վկայում են այն մասին, որ քննիչի եւ դատախազի հետեւությունները ծայրահեղ անարժանահավատ են եւ անտրամաբանական:
Կարդացեք նաև
Քննիչի եւ դատախազի այն հետեւություններն էլ են անարժանահավատ, որ Սուրիկ Խաչատրյանի ավտոմեքենայի մեջ հարվածել է միայն Զարզանդ Նիկողոսյանը: Ստացվում է, որ այդ ընթացքում ավտոմեքենայի մեջ Սուրիկ Խաչատրյանը ննջելիս է եղել՝ վիճաբանության ընթացքում: Քննիչը եւ դատախազը չեն վերլուծել, թե ավտոմեքենայի մեջ որտեղ են նստած եղել Սուրիկ խաչատրյանն ու Զարզանդ Նիկողոսյանը, որ անտրամաբանական է, որ Սուրիկ Խաչատրյանը չի մասնակցել վիճաբանությանը: Անտրամաբանական է, որ Զարզանդ Նիկողոսյանի հետ անախորժ խոսակցություն ունենալուց եւ երկու հարված ստանալուց հետո Ավետիք Բուդաղյանի վրեժխնդրության թիրախ դառնար ոչ թե Զարզանդ Նիկողոսյանը, այլ՝ Սուրիկ Խաչատրյանը»:
Հայկ Ալումյանը նաեւ ներկայացրեց, թե որտեղից է ծագել Գորիսի միջադեպը: Նա պատմեց, որ միջադեպին նախորդած խնջույքի օրը Սուրիկ Խաչատրյանը տեսել է, թե ինչպես են մի շարք բարձրաստիճաններ մոտենում Ավետիք Բուդաղյանին, նրան հարգում, ոչ թե իրեն ու ծանր է տարել դա: Հետո պահանջել է, որ «Պասաժ» կոչվող օբյեկտի կեսն իրեն տա, փայ ունենա, իսկ Բուդաղյանը չի համաձայնել:
Հայկ Ալումյանի խոսքերով՝ Արտակ Բուդաղյանի ցուցմունքները լիովին համընկնում են տեսագրությանը, իսկ քննիչի տարբերակը՝ ոչ:
Հռիփսիմե ՋԵԲԵՋՅԱՆ
