Հանգամանքների բերումով այս տարի «Դուքենդո-Ֆուլ կոնտակտ» կարատեի Հայաստանի հավաքականի մարզիկները Ռիգայում անցկացված Եվրոպայի առաջնությունում ադրբեջանցիների հետ մենամարտ չեն անցկացրել:
«Մենք հարեւան երկրի ներկայացուցիչների հետ մշտապես հանդիպում ենք Եվրոպայի առաջնություններում: Այս մեկը բացառություն էր: Նրանք միշտ գալիս են 70-75 մասնակցով` մի քանի անգամ շատ, քան մեր հավաքականը: Ընդհանուր առմամբ լավ էլ մասնակցում են: Բայց նկատել ենք մի բան. այնտեղ նրանց տրամադրում են: Ադրբեջանցիները գալիս են հատկապես հայերին, իրենց պատկերացմամբ` ծեծելու եւ հաղթելու: Դրա համար իրենց ագրեսիվ են պահում, լարված են ու ամեն անգամ ձախողվում են: Հայ մարզիկների հետ իրենց մենամարտերը չեն ստացվում: Կեցցեն մեր մարզիկներն ու մարզիչները: Մինչեւ այսօր ադրբեջանցուց պարտություն կրած մարզիկ չունենք: Եվ դա այն դեպքում, որ մեր ֆեդերացիան պետությունից աջակցություն չի ստանում եւ գոյատեւում է անդամավճարներով ու հովանավորների օգնությամբ: Դրա դիմաց հենց Ադրբեջանը հավաքականի վրա, հատկապես այս մարզաձեւը զարգացնելու համար լուրջ գումարներ է ծախսում», – տեղեկացրին բանախոսները:
Աշոտ ՀԱԿՈԲՅԱՆ
